養貓常見問題之一：貓貓要打邊啲預防針？應該點樣揀？
貓打防疫針係守護貓貓健康嘅重要防線，無論係足不出戶嘅純室內貓，定係間唔中會出街玩嘅貓貓，都需要定期注射疫苗。
貓貓預防針有邊幾種？三合一、五合一有咩分別？
貓貓疫苗主要分兩種，第一種係所有貓都建議要打嘅「核心疫苗」，第二種就係獸醫會根據貓貓生活環境同風險，再評估需唔需要打嘅「非核心疫苗」。
🔹 核心疫苗：所有貓貓都必須注射
針對嗰啲傳染性高而且致命嘅疾病，每隻貓貓都應該要定期接種：
| 預防疾病 | 症狀 | 補充說明 |
|---|---|---|
| 貓瘟 （貓泛白血球減少症） |
嚴重嘔吐、腹瀉、發高燒、白血球數量急降，死亡率極高 | 呢三種病毒傳染性極強，對貓貓健康威脅極大。香港常見嘅「三合一」或「四合一」疫苗就係針對呢啲病毒。 |
| 貓病毒性鼻氣管炎 （貓疱疹病毒） |
||
| 貓卡路里西病毒 |
延伸閱讀：貓疱疹病毒點算好？由症狀、治療到預防，教你正確應對方法！ – 怪獸部落
🔹 非核心疫苗：根據生活環境同風險決定
獸醫會根據貓貓嘅生活模式，評估係咪需要注射以下疫苗：
| 疫苗名稱 | 建議注射對象 | 預防目的 |
|---|---|---|
| 貓衣原體疫苗 (Chlamydia) | 多貓家庭、收養流浪貓、會同其他貓頻繁接觸 | 預防呼吸道感染同結膜炎 (通常包含喺「四合一」疫苗內) |
| 貓白血病疫苗 (FeLV) | 會出街嘅貓、有機會接觸其他貓 (尤其街貓) | 預防貓白血病病毒感染，降低致命風險 |
| 狂犬病疫苗 (瘋狗症) | 需要移民或出國嘅貓貓 | 符合出入境檢疫要求 (香港本地貓隻並非法例規定必須注射) |
⚠ 特別注意：
貓愛滋病 (FIV) 同貓傳染性腹膜炎 (FIP) 疫苗因保護力同潛在風險仲有好大爭議，目前喺香港非常唔普及，建議注射前必須同獸醫詳細討論。
三合一、四合一、五合一疫苗：點樣揀先啱？
- 三合一疫苗 (F3)：最核心嘅保護，預防三種最常見又危險嘅疾病——貓瘟、貓鼻氣管炎、卡路里西病毒。
- 四合一疫苗 (F4)：喺三合一嘅基礎上，再加埋對貓衣原體嘅防護，適合多貓家庭。呢個係香港非常普遍嘅選擇。
- 五合一疫苗 (F5)：喺四合一之上，再加埋對貓白血病嘅防護，主要適合生活環境多變、會出街或有機會接觸到街貓嘅貓貓。
貓貓唔出街，仲使唔使打防疫針？
絕對要！ 即使係足不出戶嘅純室內貓，都一樣有感染疾病嘅風險。傳染性病原體可能會透過：
- 空氣傳播：開窗時病毒有機會傳入。
- 主人帶返屋企：我哋出街時，衫褲鞋襪都有機會沾染到病毒或細菌帶返屋企。
為咗有效預防貓瘟呢類高傳染性疾病，建議所有貓貓都要定期注射至少核心疫苗（三合一或四合一），保護愛貓健康！
香港嘅貓一定要打狂犬病(瘋狗症)疫苗嗎？
唔一定。 香港目前係狂犬病受控制地區，根據法例，只有狗狗需要領取牌照時必須注射狂犬病疫苗。
一般喺香港生活嘅貓貓，並無法例規定要打狂犬病疫苗。
只有喺你需要帶貓貓移民或出國嗰陣，先要根據目的地國家嘅要求去注射。
貓疫苗費用大概幾多？
香港嘅獸醫診所收費各異，貓疫苗費用會因應診所地區、疫苗品牌（含唔含佐劑）等因素而有唔同。以下係一個大概嘅市場參考價（通常已包括基本健康檢查）：
貓咪三合一 (FVRCP) 疫苗
- 價格區間： 每針約港幣 $250 至 $450
貓咪四合一疫苗
- 價格區間： 每針約港幣 $350 至 $600
貓咪五合一疫苗
- 價格區間： 每針約港幣 $450 至 $800
📌 以上價錢只係參考，實際收費請以各診所為準，建議打針前先打電話查詢！
盡量揀「無佐劑」疫苗，減低致癌風險！
幫貓貓揀疫苗時，可以留意下係咪含有佐劑。
🔍 咩係佐劑？
- 佐劑係疫苗入面嘅輔助成分，用嚟加強免疫反應。
- 不過，有啲貓貓對佐劑比較敏感，可能會引發過敏反應，甚至喺極罕見情況下，引致注射部位嘅惡性腫瘤（Feline Injection-Site Sarcomas, FISS）。
💡 建議：
如果貓貓體質敏感或需要長期打針，可以考慮揀無佐劑疫苗，減低潛在風險。
打針前，建議同獸醫傾傾，揀選最適合主子嘅疫苗方案！
貓貓打針時間表：幼貓三針要隔幾耐？
🍼 幼貓打針時間表 (貓三針)
幼貓打針時間好重要。BB貓體內仲有嚟自媽媽嘅抗體，可能會影響疫苗效果。
因此，建議喺8 週大之後先開始打第一針，並按照以下時間表進行：
- 第 8 週：貓第一針核心疫苗（例如 F4 四合一疫苗）。
- 第 12 週：第二針核心疫苗，強化免疫力 (同第一針相隔約 3-4 星期)。
- 第 16 週：貓第三針核心疫苗，完成基礎免疫，達到最全面嘅保護 (同第二針相隔約 3-4 星期)。
💡 小提示：每次打完針後，都要密切觀察BB貓有冇不良反應，例如紅腫、發燒、冇精神等，一有唔妥就要即刻聯絡獸醫。
成貓打針流程
如果係新領養成貓或流浪貓，冇任何打針紀錄，就需要重新開始打針計劃：
- 首次疫苗：先注射第一針核心疫苗（如 F4 或 F5）。
- 間隔 3-4 星期：補打第二針，以確保免疫系統有足夠反應。
- 之後每年補強：完成兩針基礎後，之後每年或根據獸醫建議，定時打補強針。
💡 先做身體檢查：打第一針之前，建議先同貓貓做一次全面身體檢查，確保佢身體狀況良好先好打針。
打針時間點揀好？建議揀朝早或晏晝！
為咗減低打針後嘅風險，同埋有咩事都可以即時處理，建議選擇：
- 日間應診時段：
- 如果貓貓出現貓打完疫苗食慾不佳或發燒等副作用，都可以即刻返診所處理。避免夜晚先打，費事萬一有嚴重反應要趕去睇24小時急症，又貴又麻煩。
- 打完針後屋企有人陪：
- 打完針後，最好有人喺屋企陪住佢，隨時觀察貓打疫苗後反應，例如食慾、精神有冇變差，或者有冇異常行為，可以即時應對。
貓貓疫苗幾耐打一次？
完成幼貓三針基礎後，獸醫會根據貓貓生活環境同風險，建議補強針嘅頻率：
- 高風險環境：例如多貓家庭、貓舍，或者會經常出街、寄宿嘅貓貓，建議每年打一次補強針。
- 純室內貓 (低風險)：如果貓貓唔出街，屋企貓嘅數量又少，有啲獸醫會建議可以每三年打一次核心疫苗補強針。實際情況最好同你嘅獸醫傾下。
貓貓疫苗打邊個位？揀四肢或肚皮側邊
建議注射位置
為咗減低罕見副作用（例如腫瘤）帶嚟嘅風險，世界小動物獸醫協會 (WSAVA) 建議將疫苗打喺：
- 四肢遠離身體嘅位置 (例如手腳)
- 肚皮側邊
- 尾巴
呢啲部位一旦出現問題，可以做手術嘅空間比較大，影響較細。
唔建議嘅注射位置
頸背、背脊中間
傳統上好鍾意打喺呢啲位置，但如果發生罕見嘅腫瘤病變，會好難徹底切除，風險較大。
打預防針前注意事項
打針前，如果貓貓有以下情況，建議暫緩一下：
- 身體唔舒服：例如打乞嗤、咳、流眼水、嘔、肚痾等。
- 環境有大變動：例如搬屋、有新寵物或BB加入。
- 沖涼：打針前後一至兩星期內都避免沖涼，以免令抵抗力下降，增加副作用風險。
延伸閱讀：
打完預防針後注意事項
打完針後要密切觀察貓貓，留意以下反應：
常見副作用
- 攰、冇精神、貓打完疫苗食慾不佳
- 打針位置輕微紅腫
⚠️ 嚴重過敏反應 (要即刻睇醫生！)
如果出現以下症狀，請立即聯絡獸醫：
- 嘔吐、肚痾
- 面部水腫、皮膚痕癢
- 呼吸困難
打針位腫塊觀察：3-2-1 法則
如果打針嘅位置出現腫塊，就要留意：
- 3 個月：腫塊持續超過 3 個月都唔散
- 2 公分：腫塊直徑大過 2 cm (約一個$1硬幣)
- 1 個月：發現腫塊後，1 個月內仲持續變大
如果符合以上任何一個情況，請盡快帶貓貓睇醫生檢查。
打防疫針係守護貓貓健康嘅大事！
歡迎Share畀啱啱養貓或準備養貓嘅朋友，一齊守護主子嘅健康！