一、點樣分辨正常換毛 vs. 異常甩毛？
「貓貓甩毛」係所有貓奴嘅日常，但你分唔分得清楚邊啲係正常生理現象，邊啲又係需要警惕嘅健康問題？
正常換毛
呢個係一種全身性、均勻性嘅毛髮脫落，目的係為咗適應季節變化，通常喺春天同秋天轉季時特別明顯。正常換毛時，皮膚本身係健康嘅，唔會出現紅腫或一撻撻禿嘅情況。
異常甩毛
呢種甩毛通常係唔均勻、局部性嘅，或者甩毛量遠遠多過平時。異常甩毛好多時會伴隨住皮膚紅腫、局部禿毛、過度R痕、皮屑增多等症狀，係貓貓身體發出嘅警號。
甩毛嘅危險信號
當貓貓甩毛嘅情況伴隨以下任何一種症狀時，就要特別留神：
- 大量甩毛、全身毛髮變稀疏： 一摸主子就成手都係毛，多到得人驚。
- 局部甩毛： 喺特定區域出現一撻或多撻明顯嘅禿毛區。
- 甩毛兼有皮膚病變： 禿毛嘅地方出現皮屑、紅疹、結焦、潰瘍甚至流膿。
- 伴隨行為改變： 貓貓因為痕癢或疼痛，而出現過度舔毛、啃咬皮膚、頻繁R痕或焦躁不安嘅行為。
二、點解貓貓會異常甩毛？五大常見原因
1. 皮膚病、真菌感染、寄生蟲
- 皮膚病/過敏（對食物、環境或跳蚤口水過敏）會引發劇烈痕癢
- 真菌感染（貓癬）會造成典型嘅圓形禿塊
- 寄生蟲（跳蚤、蟎蟲）亦係引致痕癢同甩毛嘅常見元兇。
專家貼士：貓皮膚甩毛可以出現喺身體任何地方，特別常見於貓頸、貓耳仔、貓耳背同尾巴。而貓下巴甩毛，再加埋黑點點粉刺，就好可能係患上俗稱「貓暗瘡」嘅毛囊炎。
2. 營養唔均衡
毛髮主要由蛋白質構成。如果飲食中缺乏必需脂肪酸（例如Omega-3）、優質蛋白質、維他命或礦物質，就會導致毛髮脆弱、乾燥、冇光澤而且容易甩。
3. 壓力因素（心因性甩毛）
貓貓喺感到壓力、焦慮或沉悶時，會透過「過度理毛」嚟安撫自己。呢種強迫性嘅舔舐行為，會將肚皮、大髀內側或前臂嘅毛舔到斷裂甚至光脫脫。
4. 其他內科疾病
某啲全身性疾病都會影響毛髮健康，例如甲狀腺功能亢進、腎上腺功能亢進（庫欣氏症）或自身免疫系統問題等，都可能導致對稱性嘅甩毛。
5. 正常生理性換毛
主要發生喺春秋兩季，為咗調節體溫。呢個係最常見而且唔使擔心嘅貓甩毛原因。
三、貓貓甩毛嘅檢查、治療同飲食護理
獸醫點樣檢查同診斷？
由於異常甩毛嘅原因好複雜，獸醫會透過皮膚檢查（例如皮膚刮片、伍德氏燈檢查、真菌培養）、寄生蟲檢測以及抽血檢驗去搵出根本原因。
常見嘅治療方法
治療嘅核心係「對症下藥」。如果係真菌感染，會畀抗真菌藥；如果係寄生蟲，就用杜蟲藥；如果係細菌感染或嚴重過敏，就可能需要抗生素或類固醇。獸醫亦可能會處方藥用沖涼液或外用藥膏嚟輔助治療。
飲食護理
健康嘅毛髮源自均衡嘅營養。提供以動物性蛋白質為主嘅高品質主食，並可以額外添加寵物專用魚油（Omega-3）補充品，有助於滋潤皮膚、令毛髮更靚更健康。
四、點樣預防貓貓異常甩毛？
定期杜蟲、保持環境清潔
呢個係最重要嘅預防工作！無論貓貓有冇出街，都應該每個月定期使用有效嘅體內外杜蟲藥。同時，勤力清潔家居環境，減少塵蟎等致敏源。
延伸閱讀：【貓杜蟲藥推介】滴頸定口服？常見杜蟲藥牌子、價錢同副作用一次睇清
適度梳毛，減少甩毛積聚
每日或每星期梳幾次毛，可以有效管理甩毛問題，清走廢毛，減少打結同毛球形成，同時促進皮膚血液循環。
保持生活穩定，減低壓力來源
盡量避免劇烈嘅環境變動。如果有可預期嘅壓力事件（例如搬屋），可以提早同獸醫傾，使用費洛蒙等紓緩壓力嘅產品。
定期做身體檢查，及早發現疾病
每年一次嘅健康檢查，可以幫你及早發現可能引致甩毛嘅潛在內科病。
五、貓貓甩毛常見問題 Q&A
Q1：點解貓貓轉季會甩毛甩得咁犀利？
A： 呢個係為咗適應氣溫嘅自然生理反應。春天嗰陣，佢哋會甩走厚重嘅冬天底層絨毛，換上輕薄嘅夏毛，所以甩毛量會非常驚人。只要皮膚健康，呢啲都屬於正常現象。
Q2：局部甩毛變「一撻撻」一定係皮膚病？
A： 機率非常高。絕大多數嘅局部禿毛，都同真菌、寄生蟲、過敏或心因性過度舔舐有關，應視為需要睇獸醫嘅警號。
Q3：貓貓壓力大會唔會甩毛？
A： 會。壓力會導致貓貓出現「心因性甩毛」，即係透過過度舔毛嚟安撫自己，常見部位係肚皮、大髀內側。此外，巨大壓力亦可能引發「休止期甩毛」，令大量毛髮喺幾星期後一齊脫落。
Q4：幾時需要帶貓貓去睇獸醫？
A： 當你發現以下情況時，就應該盡快約獸醫：
- 甩毛區域出現局部禿塊、紅腫、皮屑或傷口。
- 貓貓表現出持續、劇烈嘅搔癢或舔舐行為。
- 甩毛嘅同時，伴隨住精神、食慾或排泄習慣嘅改變。
- 你喺屋企發現咗跳蚤或其他寄生蟲嘅蹤跡。