會唔會間唔中見到屋企隻貓，用好似大法師嘅詭異姿勢望住你，或者瞓到冇晒儀態？
其實，貓之所以咁柔軟，秘密就喺身體構造入面㗎！
柔軟嘅真相就喺骨頭結構！
（一）鎖骨退化
貓隻嘅鎖骨退化，深陷喺肌肉入面，呈浮動狀態。
亦都因為冇同肩胛骨連接，令貓隻可以自由咁做出柔軟動作、擠入狹窄空間～
（二）脊椎骨多而且間距闊
人類嘅脊椎有 32 – 34 個椎骨，相對緊密咁堆積埋一齊，幾乎冇填充物。
但貓隻具有 52 – 53 個椎骨，中間有較細嘅額外椎間盤，可以提供彈性同緩衝作用。
另外！由於貓嘅椎骨好多，脊椎可以做出更精細嘅運動，椎骨之間較闊嘅間距，容許較大嘅彎曲度同旋轉範圍，令貓嘅身體可以承受極度彎曲而唔會受傷👌
柔軟嘅身軀帶嚟啲乜嘢好處？
（一）永遠都係腳先落地
貓隻喺空中可以好精確又快速咁旋轉自己嘅身體，就算一隻倒轉嘅貓，都可以喺唔夠一秒內，完成 180 度嘅身體扭轉，就係因為骨架超級靈活喇
（二）成為狩獵之王
狩獵緊嘅貓會盡力咁收縮，將自己放低到貼近地面同埋縮埋四肢，去躲避同追踪獵物。當機會啱啱好嗰陣，就可以突然彈起身，張開四肢、穿過空氣再撲向目標
（三）方便清理身體
狩獵完咗之後，當然要好好清潔身體啦～貓隻柔軟嘅身軀，甚至可以畀佢哋抬起後腳，舔到尾骨、私處同每個腳趾，人類學唔嚟㗎嘛～
你可能仲想睇吓......
延伸閱讀👉【貓狗冷知識】藍色、黃色、綠色、異色？原來貓狗眼睛嘅顏色係咁樣決定㗎！
延伸閱讀👉【貓貓冷知識】貓隻嘅肉球有啲乜嘢功能？聽講同性格有關㗎喎!？