豆腐砂 vs 礦砂邊隻好啲？優缺點大比拼、選購攻略

豆腐砂 vs 礦砂！兩種貓砂大比拼！

喺咁多種貓砂入面，豆腐砂同礦砂係最多主人用嘅！但係兩者究竟有咩分別呢？等我哋再睇落去啦！

豆腐砂同礦砂各有優點缺點，都仲係揀唔到點算好？可以按照自己同埋小怪獸嘅需要、喜好去揀，又或者根據以下 4 點嚟考慮：

1. 清理次數
如果生活比較忙、要長時間外出嘅話，揀吸水力強嘅礦砂會比較好。

2. 健康情況
如果對粉塵敏感、或者有呼吸系統問題嘅話，揀少粉塵嘅豆腐砂會比較好。

3. 經濟預算
如果預算唔多，揀比較平嘅礦砂會比較好。

4. 貓咪對貓砂嘅接受程度
有啲貓咪對物料、氣味好挑剔，所以要試吓唔同種類，搵番啱小怪獸用嘅貓砂，呢個都係一個重要嘅考慮因素嚟㗎！

想知有咩牌子嘅礦砂/豆腐砂？可以睇吓呢兩篇：

豆腐砂係用大豆製成豆漿同豆腐之後，剩低嘅豆渣纖維整出嚟嘅。而呢種天然、食品級成分嘅貓砂，仲有咩優點同缺點呢？

1. 凝結力強
豆腐砂嘅天然纖維，有好好嘅吸收、凝結力，可以好快成塊，易鏟、唔黐底。
同黃豆纖維比較，建議揀豌豆纖維豆腐砂，凝結力會再升級！

2. 除臭力強
豆腐砂嘅植物纖維，可以吸附同包覆異味因子、避免氣體散開。

3. 少粉塵
豆腐砂嘅天然成分，加上壓縮成形，比較唔易飛粉，可以降低吸入風險、避免呼吸系統問題。

4. 少帶砂
豆腐砂嘅顆粒比較大，比較唔易黐喺貓爪同毛髮度，可以減少帶砂情況、保持環境乾淨。

5. 輕身
豆腐砂比礦砂輕身啲，可以輕鬆搬運、方便更換同清理。

6. 沖得落廁所
豆腐砂嘅結構比較鬆散，令佢溶到水、可以沖落廁所，可以減少垃圾量。

7. 環保
豆腐砂嘅成分有機，可以生物降解、堆肥，仲會隨住時間自然分解，對環境影響比較細。

8. 安全
豆腐砂用食品級成分整出嚟，如果食咗少少都消化到。
但係都係要避免小怪獸食太多貓砂㗎！

1. 難適應
鍾意細粒啲又硬嘅觸感，但豆腐砂嘅顆粒比較大、質地比較軟，可能會令貓咪覺得唔舒服，所以唔肯去廁所。
如果第一次用，建議新舊貓砂比例各一半，再慢慢加多啲，等貓咪適應；又或者揀礦物形豆腐砂。

2. 唔易保存
由於豆腐砂係用天然成分整出嚟，如果遇到潮濕環境，就好容易發霉。

建議開咗封之後擺喺陰涼乾燥嘅地方，同埋盡快用晒。

3. 價錢比較貴
因為成分同埋製作過程等因素，令到豆腐砂嘅價錢比礦砂貴。

不過相比之下，亦多咗安全、減少帶砂、沖得落廁所等優點。

礦砂係由膨潤土整出嚟嘅。作為目前最廣泛使用嘅貓砂，又有咩優點同缺點呢？

1. 吸水力強
由於礦砂用黏土、礦石整出嚟，有好好嘅吸水力，一掂到水就好快吸晒變塊狀，可以輕鬆鏟起。

2. 除臭力強
亦因為礦砂嘅吸收特性，令佢掂到排泄物之後，可以迅速吸收、膨脹，形成堅硬嘅結塊，同時鎖住尿液、避免異味散開。

3. 接受程度高
因為礦砂嘅質感同天然沙、泥差唔多，喺挖同埋掩埋排泄物嗰陣，會令貓咪覺得舒服，亦會提高去廁所嘅意願。

4. 價錢比較平
通常礦砂嘅價錢比豆腐砂平民化啲。

1. 多粉塵
因為原料同埋加工過程等因素，令到礦砂飛粉情況比豆腐砂多，容易造成呼吸系統問題。

2. 容易帶砂
礦砂嘅顆粒比較輕細，容易黐喺貓爪同毛髮度、再被帶出砂盤，所以帶砂情況相對較多，需要用多啲時間清理。

3. 比較重
礦砂嘅密度比較高，所以重量相對比較重，喺搬運、使用嗰陣，需要用多啲力氣。

4. 唔可以沖落廁所
礦砂嘅溶水力差，掂到水反而會好快吸水膨脹、凝結成塊，可能搞到喉管塞。

5. 冇咁環保
礦砂屬於唔可以再生嘅資源、唔能夠生物降解，會隨住時間不斷累積，需要好長時間先至分解到，容易對環境造成污染同破壞。

6. 冇咁安全
唔小心食咗會有消化問題，如果礦砂喺消化道形成堅硬嘅結塊，仲有可能搞到腸胃道阻塞。