原因一：唔鍾意嘅味道
貓貓埋食物嘅行為可能反映咗食嘢習慣。
如果貓貓對某種食物冇興趣，可能會試圖埋咗佢，呢個可能係對食物表示唔滿嘅一種方法嚟㗎。
所以如果貓貓對住新嘅食物做出埋沙嘅動作，可以試吓加番啲舊食物，用熟悉嘅味道引導貓貓食嘢。
而且，貓貓可能亦都會希望保持食嘢地方乾淨，所以喺食完嘢之後會試圖埋起啲剩食！
延伸閱讀 >>【貓貓知識】貓貓嘅生活空間應該點樣佈置？行為訓練師教你食嘢區、貓沙區全攻略！
原因二：唔想依家食
貓貓天生就有一種好強嘅地盤意識，當貓貓覺得食物可能俾其他動物偷走嘅時候，佢哋就會選擇埋咗啲食物，去保護自己擁有嘅資源。
呢種行為可以追溯到佢哋嘅祖先，喺野外，食物係好寶貴同好稀有嘅資源，捉到獵物之後，需要將食物收埋避免俾其他掠食者或者同類搶走。
另外，貓貓嘅胃容量比較細，所以佢哋通常都冇辦法一次過食晒所有嘅食物。
貓貓亦都會透過埋食物，等陣再返嚟食。呢種係一種長期進化過程入面形成嘅本能，所以家貓都有可能會表現出嚟㗎！
延伸閱讀 >>【貓貓健康】貓貓一日應該食幾多？貓貓食量計算速成法！
你屋企隻貓貓會唔會埋食物㗎？都歡迎將呢個知識分享俾有養貓貓嘅朋友㗎～
