如果有一日，你同屋企隻毛孩交換靈魂，你估佢哋眼中嘅聖誕節會係點樣㗎呢？
貓狗嘅身體構造同人類好唔同，佢哋睇到嘅世界原來差咁遠㗎？！
貓狗分唔到紅色同綠色
試想像下朝瞓醒，發現自己變咗做隻貓或者狗，走去客廳睇吓，點知發現本來佈置到好七彩嘅聖誕樹，點解睇落好似一堆黃色稻草咁嘅？係因為貓狗分唔到綠色同紅色！
⠀⠀⠀⠀⠀⠀⠀⠀⠀⠀⠀⠀
人類之所以睇到咁多唔同顏色，係因為視網膜有三種「視錐細胞」，而貓狗就得兩種視錐細胞，所以淨係分到黃色同藍色。
呢種分別可以話係物種自然演化嘅結果。靈長類屬於太陽出咗嚟之後先活動嘅「日行性」動物，主要靠食顏色鮮艷嘅生果維生；貓狗就係太陽落山之後先出沒嘅「夜行性」動物，相比之下，辨別顏色嘅能力對佢哋嚟講就冇咁重要喇。
有超強嘅動態視覺
如果你變成咗貓狗，想睇吓電視，呢個時候又有新發現！點解個電視畫面會好窒吓窒吓咁，好似幻燈片咁樣㗎？
係因為電視每秒大約得60格（格數即係每秒播放嘅畫面數），而貓狗嘅視力可以偵測到每秒70至100格，所以人類睇電視會覺得動作好流暢，但喺貓狗嘅眼裏面，就比較似係一張一張嘅幻燈片咁播緊喇。
睇完之後，你仲想唔想同貓狗交換靈魂睇吓呀？