貓狗可唔可以互食對方啲嘢？先了解飲食習慣有咩唔同！
Hi 各位毛孩主人！我哋最近發現，有啲多毛孩家庭嘅罐頭或者乾糧會互相食，你屋企有冇遇過呢種情況呢？
雖然咁樣餵食好方便，但貓狗始終係唔同嘅生物。對於佢哋可唔可以互食對方嘅嘢食，坊間都有好多討論。不如我哋先由佢哋嘅飲食習慣入手，了解下當中嘅分別啦！
（一）狗狗飲食習慣：需要攝取多元化食物！
狗狗需要攝取多元化嘅食物種類，包括嚟自肉類嘅動物性蛋白質，以及蔬菜中嘅天然纖維等，呢啲營養都係唔可以缺少㗎。充足嘅營養可以幫助狗狗消化暢順，維持身體健康。
（二）貓咪飲食習慣：需要以肉食為主！
至於貓咪，佢哋本身係肉食性動物，即係話除咗肉類之外，其實唔需要太多其他食材，過量嘅碳水化合物對佢哋嚟講仲係一個負擔添。
所以市面上嘅貓糧，大多都係以肉類為主。好似專為貓咪研發嘅 98%鮮肉糧 咁，碳水化合物含量少於5%，仲要冇添加澱粉穀物，用100%原肉製造，就係為咗貓咪嘅飲食習慣度身訂造嘅貓糧好例子啦！
貓狗天生嘅飲食習慣好唔同，所需嘅營養比例亦都唔一樣。如果長期互食對方嘅食物，好可能會導致營養唔均衡，甚至損害身體機能，所以真係好唔建議畀貓狗互相食嘢㗎！
貓咪可唔可以食狗糧、狗罐頭？長期食會點？
如果貓咪唔小心食到狗糧，又或者食咗狗罐頭，通常都唔會有太大問題嘅。但長期咁食，就絕對要避免啦！
舉個例，牛磺酸係貓狗維持健康好重要嘅營養素之一。狗狗可以喺體內自行合成，但貓咪就一定要靠額外補充先得。
所以有啲狗糧同狗罐頭係冇額外加牛磺酸㗎。如果長期餵貓咪食，會令貓咪缺乏牛磺酸，甚至可能引致視力同心臟方面嘅疾病，後果可以好嚴重㗎！
雖然市面上嘅貓狗罐頭同乾糧睇落口味同質地差唔多，但其實入面嘅營養成分，都係喺獸醫同營養師嘅專業監製下，為貓狗各自嘅身體狀況同需要，精心調配同度身訂造㗎。
所以建議各位毛孩主人，都係讓貓狗各自食返專屬嘅食物，先可以確保佢哋吸收到最完整嘅所需營養㗎！
貓狗鍾意互食嘢食點算好？常見問題Q&A！
（一）點樣防止貓狗互食嘢食？
如果你係多毛孩家庭，而屋企貓狗又好鍾意互食對方嘅嘢食，不妨試下以下 2 個方法，減低呢種情況發生嘅機會啦：
1. 分開用餐空間
你可以將貓咪同狗狗嘅飯碗分開擺放，甚至規劃唔同嘅用餐區域，咁樣可以避免佢哋被對方嘅食物吸引，大大減低互食嘅機會。
2. 收好食物
有時係狗狗或者貓咪食淨嘅嘢食擺喺度，或者啲食物冇蓋好擺喺出面，令貓狗有機會接觸到同互食。建議主人哋餵完食之後，即刻收好，避免佢哋食到彼此嘅乾糧或者罐頭啦！
（二）流浪貓可唔可以食狗糧？
流浪貓肚餓食狗糧唔會即刻中毒，但長遠嚟講對佢哋唔好。
狗糧蛋白質低，又冇貓貓必需嘅牛磺酸、維他命A等營養，長時間餵會搞到佢哋視力、心臟同免疫系統出事。
如果只係應急，可以畀少少，但最好都係畀貓糧或罐頭，咁先真正符合貓貓營養需求。
