貓嗅覺有幾靈敏？貓嘅嗅覺係人嘅幾多倍？

我哋人類靠視覺去感受世界，但貓貓嘅世界，卻係靠個「鼻」聞出嚟㗎！

嗅覺對貓貓嚟講，就好似超能力咁，影響佢哋嘅生活、飲食，甚至同其他貓貓嘅社交互動。

究竟有幾靈敏呢？研究指出，貓貓嘅嗅覺靈敏度係人類嘅 14 倍！

我哋嘅鼻腔大約有 500 萬個嗅覺受體，而貓貓就擁有4500 萬到 8000 萬個，甚至有啲品種可以去到 2 億個！呢個令貓貓成為名副其實嘅「嗅覺達人」，擁有超強嘅氣味偵測能力。

咁犀利，令貓貓可以做到：

1. 好容易分辨到各種氣味，對環境變化極之敏感
2. 認得出唔同嘅食物氣味，確保食物夠新鮮
3. 透過氣味認出其他貓貓、標記地盤，甚至察覺到同伴有冇發情

對貓貓嚟講，嗅覺就好似用個鼻嚟理解呢個世界！不如睇下貓貓嘅嗅覺有啲乜嘢超勁技能啦：

「呢樣嘢究竟食唔食得㗎？」 貓貓揀飲擇食其中一個原因，就係食物陣味唔啱！如果貓貓唔肯食某樣嘢食，可能係聞到咗我哋察覺唔到嘅異味，又或者覺得陣味唔夠吸引佢。

貓貓啱啱去到新環境嗰陣，總會周圍聞下、嗅下，呢個係想熟悉環境，確認係咪安全。

所以有啲貓貓對陌生地方會特別謹慎，因為佢哋「靠聞」嚟確保自己可以安心留低。

貓貓會透過尿液、面珠嘅費洛蒙，嚟標記自己嘅地盤。

當你帶新貓返屋企嗰陣，屋企本身嘅貓貓會係咁聞對方，呢個就係想確認「你究竟係邊個？你屬於邊度？」嘅行為嚟！

呢啲氣味，貓貓最討厭！

1. 清潔用品：漂白水、酒精、化學香精呢啲味太濃烈，好易刺激到貓貓嘅鼻腔，令佢哋感到唔舒服㗎。
2. 柑橘類生果：柑橘皮、碌柚、檸檬呢啲含有柑橘精油，對貓貓嚟講係毒藥嚟㗎！記得要確保屋企無機會畀貓貓掂到。
3. 蔥、蒜、洋蔥、薑：呢啲食物對貓貓嚟講係有毒㗎，無論生定熟，都千祈唔可以畀佢哋食到！

你知唔知呀？有啲貓貓甚至可以透過敏銳嘅嗅覺，察覺到主人嘅情緒變化，甚至感應到身體唔舒服或者疾病！

有啲研究顯示，貓貓可以透過氣味，察覺到糖尿病患者嘅血糖起伏㗎！

可以提早發現異樣：有啲貓貓會對生病嘅主人表現出唔尋常嘅行為，例如成日黐住主人、聞吓特定部位，甚至發出低沉嘅叫聲，提醒主人要注意健康。

雖然貓貓唔似狗狗咁被專門訓練成醫療輔助動物，但呢啲案例都顯示，貓貓嘅嗅覺世界，真係比我哋想像中更加神秘同強大得多！