每次想同主子錫一啖，唔係俾佢扭轉頭嫌棄，就係俾貓爪招呼….⠀⠀
⠀⠀⠀⠀⠀⠀
到底點解主子咁討厭錫錫？其實係因為我哋錫錯方法啫！
對於人類嚟講，嘴對嘴錫錫係表達愛意嘅方式，但對貓貓嚟講，根本就唔係咁樣一回事㗎嘛！？
畀主子更開心嘅貓砂！日日用得舒服到反晒肚！
面對面有挑釁意味
貓貓準備打交嗰陣，會面對面用眼神直望住對方，互相威嚇。
認輸嗰邊會將視線移開。所以當貓奴塊面想靠近嚟個深情一吻時，對貓貓嚟講，佢哋會以為你喺度挑釁佢呀！
所以有啲會郁手攻擊，有啲就扭轉頭走開（即係唔想同你嗌交嘅意思囉～）
貓貓用鼻哥掂你唔係想錫錫呀！
好多貓奴以為貓貓挨近自己塊面，係想錫錫，其實唔係咁㗎！
通常貓貓之間會用鼻哥輕輕掂吓對方，透過呢個動作互相打招呼，好似問緊：「頭先去咗邊度呀？」「食咗啲乜嘢呀？」。
之後就利用嗅覺嚟回應對方！
正確對貓貓表達愛意嘅方法：慢慢眨眼
喺貓貓嘅身體語言入面，表達愛意嘅方式就係「慢慢咁眨眼」。
如果你屋企隻貓望住你，仲慢慢咁瞇眼、眨眼，咁就係話緊愛你呀！
呢個時候，主人可以慢慢咁眨眼回應，貓貓就會收到你嘅心意㗎啦！
如果貓貓冇收到，總係會有落花（貓奴）有意，流水（主子）無情嘅時候㗎啦，呢個就係貓奴人生囉～
