你狗狗係咪成日周身痕，係咁R、咬手仔、撥耳仔，甚至咬Pat Pat？
相信如果屋企隻狗仔有皮膚痕癢問題，唔單止佢嘅日常生活會受到好大影響（例如夜晚都瞓唔到，係咁R到損晒流血），你做主人嘅睇到都一定會好心痛。
但係帶佢去睇獸醫，一時話要預防跳蚤同寄生蟲，一時又話要轉糧，最後又話係異位性皮膚炎，究竟係啲咩嚟㗎？食藥可唔可以控制到㗎？
到底狗狗皮膚痕癢嘅時候，主人們可以點樣幫佢呢？
睇完呢篇文，你就會了解到：
到底咩係狗狗嘅異位性皮膚炎？
現時狗狗嘅異位性皮膚炎，醫學上定義為：
「基因遺傳傾向嘅發炎同痕癢嘅過敏性皮膚病，同埋因為對環境過敏原產生IgE而引致嘅臨床病徵」。
係咪覺得上面嗰段定義好難明呢？
邊啲狗狗比較容易有異位性皮膚炎？
通常狗狗患上異位性皮膚炎嘅年紀都係「6個月大至三歲期間」，不過任何品種嘅狗狗都有機會患上異位性皮膚炎。
以下係比較高危會發病嘅狗種，包括「波士頓梗、拳師犬、沙皮狗、大麥町、英國鬥牛犬、德國狼犬、金毛尋回犬、拉布拉多、巴哥、西高地白梗犬等等」。
異位性皮膚炎有咩可能嘅病徵？
異位性皮膚炎嘅狗狗最常見嘅病徵就係「痕癢」。
主人一開始留意到嘅時候，病徵通常都只係少少嘅皮膚紅斑。如果情況再嚴重啲，可能就會出現脫毛、R損流血、膿瘡、皮膚苔癬化、黑色素沉澱等等嘅症狀。狗狗亦可能會因為痕癢而不停舔手，所以主人可以留意下佢口腔牙齦之間有冇毛髮殘留，或者腳掌有冇因為口水而染咗色。
另外，異位性皮膚炎嘅「痕癢位置分布」，常見位置包括「面部（眼周同咀邊）、腹部、鼠蹊、腋下、肛門周圍、四肢末端」（請參考附圖）；亦可能有撥頭或者R耳仔等等嘅外耳炎症狀。
一般嚟講，狗狗嘅背部皮膚區域通常都唔會受影響。但如果冇好好控制，痕癢範圍可能會擴大，痕癢嘅時間亦都可能會越來越長。
狗狗好似有異位性皮膚炎，點算好？
睇醫生前，主人需要準備好幾個問題！
- 幾時開始有呢個情況？
- 係咪突然發生定係慢慢越嚟越嚴重？
- 症狀有冇變化？（例如痕癢部位擴大、轉移等等）
- 痕癢程度有幾勁？（頻密程度、有冇影響日常生活）
- 生活環境點樣？（主力喺室內定室外活動等）
- 痕癢有冇季節性？
- 屋企其他寵物成員有冇相同症狀？
- 除咗痕癢，仲有冇其他症狀？（例如腸胃不適、嘔吐或肚瀉等）
- 舊病歷？（例如甲狀腺功能減退、庫興氏症等）
- 有冇用過藥物、做過治療？有咩反應？（例如用過類固醇、抗生素、真菌藥等等）
- 食開啲咩嘢？（包括之前食過嘅牌子同口味、有冇食人食嘅嘢、零食、潔齒骨等等，越詳細越好）
- 用開邊款杜蟲藥同幾密用一次？
透過以上問題，獸醫就可以更全面咁掌握狗狗嘅狀況，對於之後嘅診斷安排會更有幫助！
點解一定要覆診？唔可以直接開藥醫好咩？
異位性皮膚炎係唔可以單靠狗狗外表、問診，或者淨係驗血就斷症㗎，要符合以下兩點先得：
✅「病歷同臨床表現吻合」
✅「排除其他可能嘅皮膚病（例如：寄生蟲感染，好似跳蚤、蝨、疥蟲、毛囊蟲等；細菌或真菌感染；或者其他致敏源，例如跳蚤過敏、食物敏感反應）。
解決晒呢啲問題之後，先可以好好咁評估異位性皮膚炎嘅嚴重程度。
診斷異位性皮膚炎嘅流程，包括：
1️⃣問診 + 初步檢查
了解狗狗嘅生活習慣之後，醫生會再透過皮毛檢查、真菌檢查等等，確定有冇「寄生蟲」同「感染」嘅情況。
2️⃣排除診斷（寄生蟲／感染問題）
如果有寄生蟲或感染問題，要先處理呢兩部分嘅治療，之後先可以進一步診斷。
3️⃣治療與覆診評估（非常重要！千祈唔好偷懶呀！）
檢查寄生蟲／感染問題係咪已經排除，然後先處理過敏性原因嘅治療同排除。
4️⃣排除診斷（過敏性原因）
確認冇晒寄生蟲同感染問題阻住之後，如果狗狗仲係持續痕癢，就會針對過敏性原因做排除診斷，主要包括：跳蚤過敏同食物敏感。
5️⃣確診異位性皮膚炎
排除晒所有可能引起皮膚痕癢嘅原因之後，醫生先至可以確診異位性皮膚炎。
如果因為狗狗情況有改善就冇覆診，就好容易會出現反覆感染、反覆用藥嘅問題，對主人同狗狗嚟講都係一個負擔！
Ξ BONUS：皮膚致敏原測試 Ξ
皮膚致敏原測試包含咗抽血嘅致敏原血清學同埋皮膚致敏原注射測試。呢啲致敏原測試有好多限制（無論係收費、實驗室標準化定係結果判讀等），建議都係由皮膚專科獸醫負責處理。
睇完醫生之後呢？屋企可以點樣幫狗狗？
屋企護理五大貼士
1️⃣勤力清潔：
雖然致敏原好難完全避開，但係勤力清潔、定期打掃屋企，同埋用空氣清新機等，仍然有機會大大減少狗狗接觸致敏原嘅機會。
2️⃣定時沖涼：
建議每1-2個星期幫狗狗沖涼一次，沖涼本身已經可以有效紓緩痕癢不適！沖涼產品應該根據獸醫嘅建議同埋狗狗嘅皮膚反應嚟選擇。如果狗狗痕癢情況加劇，可以適當增加沖涼嘅頻率。
3️⃣遵醫囑用外用藥：
如果狗狗痕癢嘅位置好局部，或者佢哋好抗拒沖涼嘅話，主人可以考慮使用一啲局部外用嘅噴劑、乳液或者滴劑等產品，但記得要諮詢獸醫意見。
4️⃣補充魚油：
適量補充魚油 可以有效幫助修復狗狗嘅皮膚屏障，加強皮膚抵抗力。建議主人同獸醫詳細討論後，再根據狗狗需要選擇合適嘅產品。記住要持續補充1-2個月先至會睇到顯著效果㗎。
5️⃣嚴格遵從醫囑服藥：
類固醇雖然可以快速紓緩狗狗嘅痕癢症狀，但長期服用會引起多口渴、多小便、氣喘、皮膚質素變差同肚腩下垂等副作用。好彩嘅係，現時已經有好多非類固醇嘅治療藥物選擇，例如安癢快®APOQUEL®、安逸膚CYTOPOINT®等，主人可以同獸醫商量邊款最適合狗狗。
異位性皮膚炎嘅診斷同控制，無論對各位主人定係獸醫嚟講，都可能會好令人沮喪同氣餒。
各位主人必須要明白，「異位性皮膚炎雖然可以好好咁控制，但係目前冇辦法做到完全根治」。
即使係情況好穩定嘅狗狗，突然間痕癢加劇都係有可能發生嘅事，主人唔需要過份自責。
我哋嘅目標唔應該係期望狗狗可以完美地從此唔再痕癢，而係喺合理嘅範圍內，盡力改善狗狗嘅生活質素，等佢哋過得更舒服開心。
你可能仲想睇......
延伸閱讀👉【毛孩健康】貓狗口臭到好似生化武器？！呢四個方法幫你趕走主子臭臭嘴巴！
延伸閱讀👉【狗狗健康】狗狗不停抓痕點算好？由痕癢位置判斷可能皮膚病因