貓 B 飲牛奶會肚屙？乳糖不耐症及 4 種替代乳製品！

我哋成日喺電影或者電視見到，啲角色會去便利店買鮮奶餵街邊嘅貓貓。再諗深一層，貓媽媽都係餵自己嘅人奶（貓奶）畀貓 B，咁我哋係咪都可以餵牛奶畀貓貓當正餐呢？

無論係剛出世無幾耐嘅貓 B，定係成貓，都唔建議畀佢哋飲牛奶。

雖然貓 B 可以喺貓媽媽啲奶度吸收大部分營養，但因為貓奶同牛奶嘅性質唔同，牛奶畀唔到發育緊嘅貓貓所需嘅養分。

加上貓貓有乳糖不耐症，佢哋嘅腸胃機能，消化唔到咁大量嘅乳糖（牛奶嘅乳糖含量比貓奶高出 50% 以上）。

如果貓貓飲咗牛奶，好大機會會出現乳糖不耐嘅症狀。

 
• 嘔

 

• 胃脹 / 肚脹

 

• 肚屙

 

• 頭痛

另外，嚴重肚屙可能會搞到貓貓脫水，亦可能因為對牛奶入面嘅蛋白質過敏，令皮膚痕癢、紅腫等等。

雖然一般都唔建議貓貓飲貓奶以外嘅奶類，不過喺某啲特別情況下，都可以揀一啲乳製品嚟幫佢哋補充營養。

適合 0-8 星期未戒奶嘅貓 B 用！

貓用奶粉係專為貓貓設計，最適合貓貓用嘅母乳替代品。除咗提供同貓奶一樣嘅高營養成分，亦都好似普通母乳咁可以畀貓 B 輕易消化。如果貓 B 飲唔到媽咪奶，貓用奶粉就可以提供佢哋快高長大所需嘅養分。

除咗貓 B，做完手術或者年紀大需要補充營養嘅貓貓，都可以飲貓用奶粉嚟補充體力。

除咗貓用奶粉之外，專為寵物設計嘅低（無）乳糖牛奶都經過特別處理，唔需要經過乳糖酶分解都可以畀貓貓輕易吸收。

乳酪嘅乳糖比牛奶低好多，唔太會影響貓貓健康。除咗補鈣，入面豐富嘅乳酸菌仲可以幫貓貓腸道消化更暢通。

不過要注意，乳酪本身脂肪比較高，建議揀無調味、低脂嘅乳酪產品畀貓貓。

芝士可以當做貓貓嘅零食，因為好多貓都好鍾意食，可以補充豐富嘅蛋白質、脂肪同維他命。不過貓貓食得嘅芝士通常要揀低脂、低鈉、低乳糖，經過加工或者有額外添加其他材料嘅芝士就唔建議畀貓貓食啦（例如：藍芝士、蒜味芝士等等）。

喺照顧貓 B 嘅過程中，揀啱主食對佢哋健康好重要。怪獸部落嘅「寶寶鮮肉主食糧」同「寶寶無膠主食罐」專為貓 B 設計，提供高質鮮肉，滿足貓 B 嘅成長需求。