隻貓有蝨點算好？點樣睇隻貓有冇蝨？逐步教你徹底清除貓蝨！

貓跳蚤係最常見嘅體外寄生蟲，可以好容易咁跳上貓貓身上，喺毛髮之間捐嚟捐去吸血，除咗搞到貓貓勁R痕，嚴重感染甚至會引致皮膚炎、甩毛、貧血，仲有可能傳播疾病。

如果你想知道點樣檢查貓貓有無染到貓跳蚤，同埋有效嘅治療同預防方法，咁就跟住我哋繼續睇落去啦！

伸延閱讀：貓貓體外寄生蟲介紹｜跳蚤、耳疥蟲、疥癬蟲、牛蜱防治全攻略

如果懷疑貓貓染到跳蚤，可以由以下徵狀同檢查方法嚟判斷：

• R痕同過度舔毛：俾跳蚤咬到會搞到貓貓好R痕同痛，佢哋可能唔停咁R痕、過度舔毛，甚至用牙齒咬皮膚。
• 皮膚受刺激同甩毛：皮膚上面可能會有紅疹、結焦或者皮屑，長時間R痕仲會引致紅腫同甩毛。有啲敏感嘅貓貓甚至會出「粟粒性皮膚炎」。
• 發現跳蚤便便：睇落好似黑色一點點，如果放喺濕紙巾上面有紅棕色血漬，就肯定係跳蚤便便。

• 肉眼檢查：撥開啲毛睇下有無異物，特別係頭部、尾巴根部、腋下同埋大髀內側。
• 用蚤梳：梳毛，然後將甩出嚟嘅嘢放喺白紙巾或者梘水度，睇下有無跳蚤或者蚤便便。
• 留意隱藏嘅跡象：有啲貓貓會舔走啲跳蚤同便便，如果仲係懷疑，就建議交俾獸醫檢查。

伸延閱讀：貓貓身上有蟲點算好？12 種常見寄生蟲同杜蟲方法一次過講晒你知

跳蚤一生分做四個階段：卵、幼蟲、蛹、成蟲，每個階段都有唔同嘅特徵同影響：

跳蚤吸完血之後 1-2 日就會開始生白色橢圓形嘅卵，跳蚤卵細到肉眼好難睇到。

而且跳蚤每日可以生 20–50 粒卵，一生加埋可能過千粒，好容易就會由貓貓身上跌落環境度，再繼續傳播俾其他貓貓。

卵會喺 1–6 日之內孵化成白色嘅幼蟲，細細長長咁，跳蚤幼蟲唔吸血，主要食環境裡面嘅有機碎屑同跳蚤便便。

當幼蟲大約兩個禮拜左右就會變做蛹，跳蚤蛹可以休眠幾日、幾個禮拜，甚至一年，仲可以抵抗大部份藥劑。等到附著喺適合嘅宿主身上嗰陣，先會孵化出成蟲。

孵化出嚟嘅成蟲會好快跳到宿主身上吸血，雌蚤吸到血之後大約 2 日就可以再次生卵，不斷咁繁殖落去。

跳蚤最快兩個禮拜就可以完成一個生命週期；如果環境唔好，成個過程可能會拖長到幾個月甚至一年，所以一旦貓貓身上有跳蚤，就一定要特別留意！

伸延閱讀：貓貓耳仔入面嘅咖啡渣係乜嚟㗎？貓貓耳疥蟲徵狀、治療同預防方法

貓跳蚤嘅傳染方式好多種，稍為唔小心就好可能搞到屋企嘅貓貓中招。以下係常見嘅兩種途徑：

跳蚤可以直接由一隻動物跳到另一隻，只要屋企有一隻貓或者狗染到，跳蚤就好可能好快咁散開去所有寵物身上。

跳蚤卵、幼蟲同蛹成日匿喺地毯、梳化、寵物床等地方，亦可能經由人嘅衫褲、鞋或者訪客帶返屋企。

所以就算係完全唔出街嘅室內貓，都有可能因為主人唔小心將跳蚤帶返屋企而被感染。

伸延閱讀：貓pat pat有「白芝麻」？貓絛蟲徵狀、治療、點樣預防？

要徹底解決貓跳蚤問題，除咗幫貓貓直接清除跳蚤，屋企環境都要徹底清潔，如果唔係好快又會復發。以下係常見嘅做法：

• 梳毛同沖涼：首先用蚤梳仔細梳毛，可以杜走部份成蟲同便便，同埋將梳出嚟嘅跳蚤掉落梘水度殺死。沖涼都可以幫手清除，如果需要用杜蚤洗毛水，就一定要喺獸醫指導下進行。
• 藥物治療：獸醫通常會開適合貓貓嘅口服或者外用杜蚤藥，可以有效殺死跳蚤，同埋阻止佢哋繼續繁殖。常見副作用可能包括短暫嘔吐、流口水或者胃口唔好，用之前一定要諮詢獸醫。

• 高溫清洗：將貓窩、氈仔、布套呢啲可以拆出嚟嘅嘢用熱水洗，再烘乾或者曬太陽，可以殺死唔同階段嘅跳蚤。
• 每日吸塵：針對地毯、傢俬罅隙、貓貓成日去嘅地方加強清潔，同埋即刻處理吸塵袋，避免喺入面孵化。
• 降低濕度：跳蚤鍾意潮濕環境，用抽濕機或者冷氣將室內濕度維持喺 50% 以下，可以減少佢哋繁殖。
• 環境用藥劑：用標示「貓貓適用」嘅殺蟲劑，針對床底、牆角、地板裂縫呢啲地方噴灑，確保殺死新孵化嘅幼蟲。用嗰陣要隔離貓貓，同埋等藥劑靜置之後再清潔。

⚠️ 提提你：清除跳蚤通常需要幾個月持續進行，如果中途停咗，好大機會會再爆發。

伸延閱讀：毛孩身上嘅吸血地雷！詳細講解「牛蜱」嘅徵狀、治療同預防全攻略

因為香港氣候溫暖潮濕，跳蚤全年都可以繁殖，所以全年防護對貓貓健康好重要。

就算係完全唔出街嘅室內貓，都建議定期用獸醫推薦嘅預防產品，以下就嚟介紹預防跳蚤常見嘅產品：

• 杜蚤口服藥：通常可以殺死成年嘅跳蚤，但係對卵同幼蟲無效，所以通常需要配搭其他產品一齊用。常見副作用可能包括短暫嘔吐、流口水或者胃口唔好，用之前一定要諮詢獸醫。
• 外用杜蚤滴劑：係好多主人同獸醫常用嘅選擇，可以同時阻斷唔同階段嘅跳蚤，每個月喺貓貓後頸滴一次，效果持久又方便。

• 千祈唔好將狗用嘅杜蚤產品用喺貓貓身上，因為成分可能對貓貓有致命危險。
• 請依照產品說明書，用啱嘅劑量同埋間隔時間使用，唔可以隨意增減。
• 如果屋企有多過一隻寵物，一定要同時做預防，避免交叉感染。

• 所有寵物同步預防：等屋企所有寵物都接受杜蚤措施，因為只要一隻寵物身上有跳蚤，其他都會有感染危機。
• 保持乾淨：主人返到屋企嗰陣可以檢查下自己身上，屋企環境定期清潔保持乾淨，同埋配合吸塵習慣，就可以減少跳蚤滋生。
• 避免放養：避免貓貓出入戶外、同流浪動物接觸，可以降低由戶外帶返跳蚤嘅機會。

人都會俾貓跳蚤咬㗎！雖然佢哋更鍾意喺毛髮濃密嘅動物身上生活，但當搵唔到合適宿主嗰陣，都會轉為咬人類。

但人體無乜濃密毛髮，唔適合跳蚤長久棲息，所以佢哋通常只會吸少量血就會走，再返去環境度等下一個宿主。

• 人類俾咬嘅徵狀：通常會有一排或者三角形分佈嘅小紅疹，周圍通常有紅腫，而且好R痕。
• 高危群組：細路仔、大肚婆或者皮膚比較敏感嘅人，喺跳蚤數量多嘅環境度更容易俾咬。

需要！就算係室內貓，跳蚤都仲可能跟住人帶返屋企之後感染，所以都要定期做體外杜蟲。

建議自己買之前最好問下獸醫，因為杜蚤藥種類好多，透過專業建議先可以揀到對貓貓最安全嘅產品。