貓貓每次跑動、跳高跳低，其實都會對關節造成勞損。你知唔知？關節嘅損耗係無得逆轉㗎，所以及早做好家居護理同埋飲食保養好重要。即刻嚟睇下點樣好好保護你嘅貓貓關節啦！
呢啲行為，其實好傷貓貓關節？
由高位跳落、用後腳企、喺跣手跣腳嘅地板上面跑動、長時間跳嚟跳去、身型過重，呢啲睇落好普通嘅情況，其實都會增加貓貓關節嘅負荷，導致「軟骨」勞損。
軟骨係乜？點解會磨蝕？
軟骨可以想像成係骨頭之間嘅「避震墊」，幫手吸收同緩衝骨頭承受嘅壓力。不過，軟骨同滑囊液會隨住時間流逝，造成無可逆轉嘅損耗同磨蝕，最終令骨頭互相摩擦而引起痛楚。所以如果冇及早開始做足保養，關節就好可能會提早衰老㗎！
貓貓關節痛有咩跡象？
貓貓唔識講嘢，而且好捱得痛，所以各位主人要密切留意佢哋嘅行為有冇異常，先可以及早發現問題。以下係常見嘅痛楚跡象，如果你隻貓貓出現呢啲行為，並已經維持咗一段時間，建議帶佢哋去獸醫度檢查：
🔹 活力下降：唔多郁動、成日瞓
🔹 行為轉變：出入貓砂盆有困難、撐拐腳/跛下跛下、長時間攤喺度坐 (俗稱「阿叔坐」)、突然唔鍾意俾人摸
🔹 脾性改變：唔鍾意同人玩、脾氣變得暴躁
邊啲貓貓，關節出事機會大啲？
🔹 先天基因因素：
1. 部分貓品種，受基因影響會有先天性關節結構異常、軟骨發育不全嘅問題，例如：摺耳貓。
2. 老年貓貓：軟骨組織修復能力會下降。
🔹 後天因素：
1. 外來損傷：以前試過關節脫臼、移位等創傷，例如：從高處跌落、撞傷等。
2. 肥胖：身型過重，長期令關節承受過大壓力。
點樣保養貓貓關節？
🔹家居環境：擺放寵物梯、鋪設防滑墊
🔹飲食貼士：建議多補充Omega3、軟骨素、膠質，助你維持健康活力
(例如：綠貽貝、雞冠、羽衣甘藍、三文魚、西蘭花等）
