點解貓貓會炸毛？
你有冇見過屋企主子突然間全身啲毛戙晒起身，條尾仲變到好似雞毛掃咁鬆郁郁呢？呢種現象就係我哋平時講嘅「貓炸毛」喇。
呢個係貓貓好常見嘅生理同情緒反應，原理係佢哋嘅「豎毛肌」收縮，令啲毛由原本平鋪變到直立，等佢哋睇落大隻啲、威猛啲嚟嚇走敵人。其實呢樣嘢同我哋人類因為太凍或者驚到起「雞皮疙瘩」嘅原理好似㗎咋！
想再深入了解吓主子炸毛背後嘅心理秘密？即刻跟住我哋睇落去啦！
貓炸毛 4 大原因
原因 1：受到威脅或者好驚
突然嘅巨響（好似打雷、煙花）、有陌生人或動物出現，甚至你唔小心摸到佢嘅敏感部位，都有可能令佢炸毛。呢個係一種即時嘅反射反應，等佢睇落去更強壯，試圖嚇走潛在嘅威脅。
原因 2：嬲緊或者想攻擊
當貓貓喺度霸地盤或者同其他貓「對峙」嗰陣，炸毛就係好明顯嘅警告訊號，代表佢而家好唔爽，需要空間，叫你唔好埋去呀！
原因 3：玩到太 High 或者好興奮
貓 B 或者後生貓貓喺追緊玩具或者同你玩緊嗰陣，可能會因為過度興奮而炸毛。呢種情況通常唔係因為驚，純粹係佢情緒太亢奮、玩到瘋狂咗嘅表現。
原因 4：天氣太凍
喺凍冰冰嘅環境，貓貓會透過輕微炸毛嚟增加毛髮之間嘅空氣層，形成保溫效果，幫手維持體溫，令自己暖啲。
主子炸毛嘅肢體語言代表咩？
當貓貓炸毛嗰陣，細心睇吓佢嘅肢體動作其實會透露更多訊息。無論係條尾、背脊定係動作，每個細節都係喺度同你講緊佢嘅心情：
行為 1：貓尾巴炸毛
- 尾巴向下炸毛：通常係代表驚或者緊張，常見於貓 B。呢個時候佢哋可能會縮埋一嚿，睇落好不安。
- 尾巴向上炸毛：代表佢好嬲或者警告緊你。通常會伴隨住拱背、低吼，甚至條尾會快速揈嚟揈去，明顯係講緊「咪埋嚟」！
行為 2：貓咪炸毛拱背
貓貓一邊炸毛一邊弓起個背脊，呢個係經典嘅威嚇動作。佢想令自己身形睇落大隻好多，去嚇退對方或者消除威脅。
延伸閱讀：貓咪拱背代表咩？係嬲定係想玩？
行為 3：貓咪炸毛亂衝
貓貓喺受驚或者超級興奮嗰陣，可能會一邊炸毛一邊好似癲咗咁周圍跑，條尾仲會震吓震吓，甚至喺屋企九秒九穿梭，呢個係情緒過度激動嘅表現。
主子炸毛咗，奴才應該點做？
見到主子炸毛，好多奴才都會心慌慌，唔知應唔應該安撫佢。其實最啱嘅做法係先睇吓環境，再跟返佢嘅情緒去回應，以下有幾個建議畀大家。
應對法 1：保持淡定
千祈唔好大聲鬧或者突然有大動作。保持環境安靜穩定，主子先會更快冷靜落嚟。
應對法 2：畀啲空間佢
由得佢自己靜吓。如果有需要，可以提供一個安靜嘅匿埋位畀佢，呢樣嘢可以幫佢快啲攞返安全感，減低壓力。
應對法 3：適度氹吓佢
如果貓貓主動行埋嚟搵你，可以輕輕摸吓佢，用溫柔嘅聲線同佢傾吓偈，畀佢感受到你嘅支持同陪伴，慢慢建立返安全感。
應對法 4：搵專家幫手
如果主子成日無啦啦炸毛，或者炸完之後仲持續好有攻擊性，建議去問吓獸醫或者動物行為專家，睇吓係咪身體唔舒服或者有心理問題。
貓炸毛常見問題 Q&A
Q1：貓貓突然炸毛代表咩？
多數係因為無啦啦有大聲或者陌生嘅刺激，觸發咗佢哋本能嘅防禦反應。呢個時候貓貓想令自己睇落大隻啲，嚇走佢覺得危險嘅嘢。
Q2：貓 B 同大貓炸毛有無分別？
係有分別㗎。貓 B 好多時係喺玩緊嗰陣炸毛，呢個係佢哋探索世界同學習社交嘅過程；而大貓就多數喺受驚、威嚇或者嬲嗰陣先會炸毛，係一種防禦或者警告。