除蟲菊貓奴必知！貓聞到殺蟲劑會唔會中毒㗎？除蟲菊預防全面攻略

喺香港潮濕炎熱嘅天氣度，蚊蟲數量好多時都會暴增，好多主人都會選擇用殺蟲劑、電蚊香或者蚊貼嚟杜蟲。

不過，呢啲睇落好普通嘅家居用品入面，可能含有對貓貓極度危險，甚至係致命嘅成份——除蟲菊，而除蟲菊亦都分做以下兩種：

• 除蟲菊素（Pyrethrins）：呢種係由菊花（Chrysanthemum）花朵度提煉出嚟嘅天然殺蟲劑，可以好快咁麻痺昆蟲嘅神經系統。佢嘅特性係作用快、毒性低而且容易分解。
• 類除蟲菊精（Pyrethroids）：市面出售嘅產品好多都屬於呢類，科學合成嘅藥效更強、殘留時間更長。其中百滅寧（Permethrin） 對貓貓嚟講尤其有強烈毒性。

雖然除蟲菊喺正常劑量下對人類同狗狗嚟講相對安全，但對貓貓嚟講就係劇毒！

我哋會深入分析貓貓除蟲菊中毒嘅原因，同埋教你點樣辨識危險成份、症狀、緊急應對同埋預防方法，去守護貓貓嘅健康！

延伸閱讀：龜背芋貓狗唔食得？10種家居常見對貓狗有毒嘅植物

貓貓會對除蟲菊中毒，原因係佢哋嘅肝臟天生缺乏代謝除蟲菊成份嘅能力，導致毒素喺體內累積同埋刺激神經系統，造成過度興奮同埋中毒。常見嘅接觸途徑如下：

呢個係最常見嘅原因，主人用錯咗含有高濃度除蟲菊（尤其係百滅寧）嘅「狗狗專用」滴劑、沖涼液或者頸圈用喺貓貓身上。

當貓貓同啱啱點完藥（藥劑未乾嘅 24 個鐘頭內）嘅狗狗瞓埋一齊或者互相舐毛嘅時候，可能會間接接觸到而中毒。

好似殺蟲劑噴霧、水煙、電蚊香、蚊貼，又或者係登革熱防治噴藥、草地殺蟲劑。

殘留嘅藥劑黐喺地板、傢俬或者毛髮上面，最後俾貓貓舐咗落肚。

貓貓主要係透過「皮膚接觸」同「舐食」中毒，主要嘅危險並唔係喺吸入除蟲菊成份度。

但就算只係「聞到」，都有極高機會代表藥劑微粒已經跌咗喺毛髮上面，當貓貓理毛嘅時候就會將毒素食咗落肚，所以主人都仲要確保貓貓同受污染嘅環境完全隔絕，咁樣都會比較安心㗎！

症狀可能會喺接觸後幾分鐘到幾個鐘頭內出現，亦都可能會延遲長達 72 個鐘頭，同埋持續 2–3 日。常見中毒症狀會根據嚴重程度分做：

• 常見症狀：肌肉顫抖同抽搐（最典型）、不斷流口水、嘔吐、肚瀉、耳仔或者塊面抽動。
• 行為症狀：焦躁不安、過度興奮、對聲音或者掂到敏感、匿埋、冇晒精神。
• 神經症狀：行路唔穩、失去平衡（共濟失調）、瞳孔放大。
• 嚴重症狀：癲癇發作、呼吸困難、體溫異常，如果冇即時治療，可能會喺幾個鐘頭內致命。

1. 如果貓貓唔小心接觸到除蟲菊，請即刻停止接觸，同埋聯絡獸醫。
2. 如果係皮膚接觸到嘅話，喺獸醫指導同埋生命跡象穩定嘅情況下進行皮膚去污，用暖水同溫和嘅洗潔精或者貓用沖涼液幫貓貓沖涼，去除殘留嘅藥劑。
3. 帶埋產品資料，將可疑產品嘅包裝或者成份影相帶去醫院，有助獸醫快速診斷。