貓貓翹屁屁、個patpat戙高係咩意思？

貓咪翹屁屁俾你摸，係因為太～舒服？定係另有內情呢？其實原因有好多㗎！

小貓啱啱出世兩個禮拜之內，身體非常脆弱，貓媽媽會靠舔嚟刺激小貓排便。大個咗嘅貓咪保留咗呢個條件反射，當信任嘅主人撫摸時，便唔自覺咁翹起自己個屁股。而翹屁股都係幼年爭寵嘅手段，表示佢想你錫佢㗎～

貓行為研究員 Mikel Delgado 指出，貓咪之間嘅溝通主要靠氣味，互相舔屁股係貓咪打招呼同確認對方身份嘅方法。貓咪喺邀請其他貓咪認識自己嗰陣，就會翹起屁股俾佢哋聞或者舔、非常自豪咁翹起個屁股！

貓咪嘅地盤意識，令佢哋會喺地盤上留低自己嘅氣味，而屁股味道濃郁，將屁股對住主人傳遞氣味，可以俾其他生物知道：「呢個貓奴係我㗎！」

如果係仲未絕育嘅母貓，入發情期嗰陣都會有翹屁股嘅現象，唯一唔同嘅係，翹屁股嘅同時，條尾都會傾向一邊，後腳會出現踩踏嘅動作！

貓咪嘅下巴同後腰，都係佢哋自己掂唔到嘅地方、神經密佈，所以好多貓咪都鍾意呢啲部位俾人摸。當貓咪可以毫無防備咁將屁股對住你，都代表佢對你，有絕對嘅信任㗎！

你係咪試過坐喺沙發度，點知貓咪跳咗上嚟，跟住將個屁股直接對住你？

好多主人會疑惑：「呢個係咪喺度挑釁我？」其實，呢個並唔係貓咪嘅無禮行為，而係一種常見嘅社交信號，顯示佢對你嘅信任同親密感。

喺貓咪嘅世界入面，氣味係最重要嘅溝通方式。當貓咪將個屁股對住你，通常代表佢當你係自己社交圈嘅一部分，甚至係最親近嘅屋企人。

原因	解釋
社交行為	呢個係貓咪之間嘅習慣，就好似打招呼咁。
舒服同信任	代表貓咪對你覺得安全，願意將背脊交俾你。
生理反應	摸尾巴根部會引起自然嘅肌肉反應。
發情行為？	大部分情況同發情無關，但未絕育嘅母貓可能有呢個動作。

如果你唔介意貓咪呢種行為，可以輕輕摸吓佢嘅尾巴根部，或者用溫柔嘅語氣同佢講嘢，等貓咪感受到你嘅回應。

如果你對貓咪呢個行為覺得唔自在，或者唔想一直望住佢個屁股，你可以咁做：

• 輕聲叫貓咪個名，吸引佢轉身望你
• 攞出貓咪最鍾意嘅玩具，等佢改變姿勢
• 用零食引導佢轉身對住你，建立唔同嘅互動模式

咁樣，你既唔會等貓咪覺得俾人忽視，亦都可以等佢逐漸適應用唔同嘅方式嚟表達親密。

延伸閱讀👉【貓狗冷知識】藍色、黃色、綠色、異色？原來貓狗眼嘅顏色係咁樣決定㗎！

延伸閱讀👉【貓貓冷知識】貓咪嘅肉球有咩功能？聽講同性格有關㗎喎！？