貓咪唔出街就唔使杜蟲？
答案係：錯❌
寄生蟲都可能會透過主人外出時沾染帶返屋企，再跳到貓咪身上。
更危險嘅係，透過叮咬有機會傳播嚴重疾病，貓主人千祈唔可以忽略！
咩係血巴東蟲？
血巴東蟲係一種血液寄生蟲，會破壞貓咪嘅紅血球，從而引致貧血問題，所以又叫做「貓傳染性貧血(FIA)」。
血巴東蟲可能會透過 ✔吸血性節肢動物(跳蚤、牛蜱) ✔經胎盤垂直感染 ✔貓咪打交咬傷 等途徑傳播。
貓咪感染血巴東蟲嘅常見症狀
貓咪感染血巴東蟲後嘅常見症狀包括：貧血、發燒、急性虛脫、呼吸困難、黏膜蒼白、脫水、體重下降、黃疸、精神萎靡、食慾不振
⚠️貓咪染病會唔會致命？
大約有30%嘅貓咪會因為呢個病而死亡。就算經過治療，佢哋都可能會終身帶原，當貓咪抵抗力差嘅時候，仍然有機會翻發。
點樣預防血巴東蟲？
避免貓咪放養出街
–減少貓咪俾帶菌害蟲叮咬嘅機會
–避免貓咪同嚟歷不明嘅貓接觸
做好日常杜蟲同預防措施
–定期為貓咪杜蟲
–定期做家居消毒同清潔
貓咪杜蟲要留意嘅地方
延伸閱讀：【貓貓杜蟲藥懶人包】點揀最啱？貓貓杜蟲藥收費、功效比較攻略
血巴東蟲常見問題 Q&A
Q：血巴東蟲點醫治？
A：由於呢種病冇得斷尾，只可以透過藥物去控制血巴東蟲嘅數量。如果貓貓嚴重貧血，就需要輸血最少兩至三個星期。如果搵唔到合適嘅捐血貓，就要向血庫買血，每次覆診嘅治療收費分分鐘要幾萬蚊！
Q：人類會唔會感染到？
A：唔會！血巴東蟲只會喺狗同貓之間出現，貓貓比較常見，狗狗就比較少見。
