藍色、黃色、綠色、異色？原來狗仔對眼嘅顏色係咁決定㗎！

你知唔知狗狗眼睛顏色係點樣決定㗎？
點解狗狗嘅眼睛夜晚會發光㗎呢✨

因為仲未發育完全，幼犬嘅眼睛通常都係藍色㗎啦~

• 狗仔細個嗰陣，眼珠嘅虹膜色素仲未定形，所以顏色會係深淺不一嘅灰藍色。通常等佢哋大約一個月(即係3至8個星期)大左右，隻眼真正嘅顏色就會慢慢浮現出嚟，視力亦都會慢慢變得清晰㗎啦！

狗仔嘅眼睛顏色，主要都係由黑色素去決定㗎！

狗隻嘅眼睛虹膜入面，本身就含有黑色素細胞。當眼睛發育成熟之後，黑色素細胞就會產生黑色素，而色素嘅多寡，就正正決定咗眼睛嘅顏色深淺喇！

究竟咩嘢係異瞳？

• 即係其中一隻眼有過多或者缺乏黑色素嘅情況，呢個可能係先天基因遺傳，亦有可能係後天視神經受損而引起嘅。

咁異瞳又會唔會影響狗仔視力㗎？

• 其實又唔會嘅！如果係先天性異瞳，一般嚟講係唔會影響到視力嘅。不過，由於缺乏黑色素，狗仔嘅眼睛可能會對光線比較敏感，所以主人平時最好就避免俾佢哋直接俾太猛烈嘅陽光照射到隻眼，費事搞到眼睛唔舒服啦！

狗狗夜晚隻眼識發光嘅秘密：脈絡膜層

• 脈絡膜層係好多脊椎動物都有嘅眼部結構，佢可以充分利用入眼嘅光線，大大增強夜視能力，即使喺漆黑環境都睇得好清楚。

狗狗嘅眼珠顏色會影響反光顏色

視乎狗狗天生嘅虹膜顏色，反光出嚟嘅色都會有唔同！

如果狗狗隻眼突然變色，或者望落去好似蒙查查、混濁咗咁，好大機會係患病嘅徵兆！

眼部感染、眼球發炎都有機會導致眼珠顏色異常，如果主人冇及時帶佢哋去睇醫生，嚴重嘅話可能會對眼造成永久損害，甚至有失明風險！