你知唔知呀？狗狗搖尾巴，其實唔一定代表開心㗎！
狗狗好多情緒都會令條尾搖吓搖吓，所以想了解狗狗嘅心情，仲需要配合埋肢體語言嚟綜合判斷。睇吓條片，學識解讀狗狗嘅心情啦❤️
狗狗尾巴語言
（一）開心、興奮嘅尾巴
尾巴狀態：狗狗條尾大幅度擺動、打圈
肢體語言：輕鬆咁行、伸脷 / 笑得好燦爛
狗狗呢個時候心情非～～常好，呢個時候，開開心心同佢玩啦！
（二）緊張、敵意嘅尾巴
尾巴狀態：狗狗條尾好大力咁快速咁甩、豎直
肢體語言：趴低拱背、豎起耳仔低吼、皺鼻頭
狗狗呢個時候已經喺度警告你唔好埋嚟，盡量離遠啲，如果唔係狗狗就唔客氣㗎喇！
（三）謹慎思考嘅尾巴
尾巴狀態：狗狗條尾慢慢咁擺動
肢體語言：猶豫、行路慢吞吞、若有所思咁望嚟望去
狗狗呢個時候謹慎思考緊，呢個時候請你唔好打擾佢住，如果佢準備好咗，自然會走埋嚟你度㗎喇！
（四）傷心、害怕嘅尾巴
尾巴狀態：狗狗條尾垂喺地、夾喺兩隻腳之間
肢體語言：耳仔向後貼實、發出嗚嗚悲鳴聲
呢個時候狗狗好驚呀！唔信任、而且缺乏自信，呢個時候請你唔好畀太大壓力狗狗住，畀啲時間佢、釋出善意慢慢咁行埋去，相信狗狗好快就會準備好㗎喇。
（五）友善、示好嘅尾巴
尾巴狀態：狗狗條尾打橫而且好快咁擺動，速度好規律
肢體語言：表情放鬆友善
狗狗通常喺發現新朋友、見到主人嗰陣會做呢個尾巴動作，係同你講：「喂～你好呀～想唔想交個朋友呀～」
你可能仲會想睇：
延伸閱讀👉【狗狗行為】狗狗示愛嘅五個行為！