你有冇試過見到你嘅貓貓聞完你對臭襪之後，竟然露出一個又驚訝又擘大個口嘅天然呆樣呢？
其實佢哋唔係俾啲味臭暈咗！而係透過犁鼻器想更仔細咁「品嚐」啲氣味，呢個行為又叫做「佛勒門反應」（亦稱裂唇嗅反應）。
犁鼻器：佛勒門反應嘅關鍵器官
有啲氣味單靠鼻哥係聞唔到㗎，例如會影響貓貓社交、交配嘅費洛蒙。
呢個時候就需要「位於前排牙齒後方嘅犁鼻器」幫手解讀呢啲特別嘅氣味🤔。
貓貓擘大個口係為咗仔細品嚐味道
透過佛勒門反應，貓貓可以解讀到嘅氣味「訊息」，係我哋人類好難想像到㗎！
例如某隻生物係咪處於發情期／佢哋嘅生理機能狀態／或者獵物離開咗幾耐。
其實人嘅腳臭味、腋下臭味，都會散發出類似費洛蒙嘅氣味，所以貓咪就會擘大個口，等啲氣味分子流入犁鼻器，慢慢品味一番！
所以，各位主人唔使再擔心貓咪係咪畀對臭襪薰暈咗啦，其實佢哋正喺度細心品味緊呢個世界嘅獨特「風味」㗎😻
你可能仲想睇...
延伸閱讀👉【貓咪冷知識】古代貓咪個名好中二？即刻睇吓你隻貓貓喺古代會叫咩名！
延伸閱讀👉【貓咪行為】貓貓耳仔會講嘢？！想了解貓貓心情？即刻睇呢度啦！
