狗狗狂甩毛？可能係「狗癬」搞鬼！
狗狗出現一撻撻圓形甩毛、皮膚紅腫結焦？除咗可能係敏感或者生跳蚤之外，亦好大機會係「狗癬」造成㗎！
狗癬學名叫皮癬菌症（Dermatophytosis），係一種由皮癬菌引起嘅淺層真菌（霉菌）感染，患處通常會呈現不規則嘅圓形，睇落好似一個個銀仔咁，所以亦都被叫做「金錢癬」。
任何狗狗都有機會惹到皮癬菌症，特別係狗 B（幼犬）、老狗、抵抗力比較差嘅狗狗，更加係高危一族。
我哋會帶你全面了解狗癬嘅傳染方式、症狀、治療及照顧建議，幫小怪獸早日好返，並防止喺屋企入面交叉感染！
狗癬常見症狀有邊啲？
當狗狗感染狗癬嗰陣，身體會出現一連串皮膚病變，最常見嘅位置包括面部、耳仔尖、條尾末端同腳趾罅等部位。
以下係主人最容易留意到嘅狗癬症狀：
- 一撻撻圓形甩毛，邊緣紅腫、發炎、結焦
- 皮膚乾爭爭、有白色或者灰色嘅皮屑（頭皮）
- 毛髮變得稀疏、好脆好易斷
- 出現𢯎痕、係咁舐或者周圍磨蹭嘅行為
- 皮膚出現紅斑、生暗瘡（膿皰）
- 色素沉澱令到皮膚變黑
有啲狗癬嘅初期症狀睇落只係輕微甩毛或者皮膚鞋烚烚，所以好容易被人忽略，但如果拖延治療，唔單止會擴大感染範圍，仲可能會搞到永久性甩毛（生唔返啲毛）。
建議主人如果發現以上症狀，應該盡早帶狗狗睇獸醫檢查，及早確診並對症下藥！
狗癬係點樣傳染㗎？
皮癬菌好容易喺溫暖潮濕嘅環境（例如香港嘅春天/回南天）生長繁殖，並透過孢子傳播感染。
而且孢子嘅生命力極強，可以喺環境入面存活幾個月甚至長達 18 個月，所以傳染途徑都非常多，以下列出常見嘅傳染方式：
直接接觸
最常見嘅傳播方式係接觸到受感染嘅動物。
當健康嘅狗狗同患有皮癬菌症嘅動物玩或者接觸，皮膚上面嘅真菌孢子就有可能轉移並造成感染。
特別係喺動物收容所、寵物酒店或者養多過一隻寵物嘅屋企，動物之間親密接觸嘅機會多，就更加容易交叉感染。
間接接觸
狗狗平時接觸到嘅狗梳、玩具、狗床、地毯、狗籠等用品，只要沾到皮癬菌孢子，都有可能成為傳播源頭。
另外，人類對手、衫褲或者鞋底都有可能唔小心沾上孢子，再惹畀屋企其他動物，所以人同動物之間嘅「間接接觸」絕對唔可以睇小！
狗癬會傳染畀人嗎？
會㗎！狗癬係一種人畜共通傳染病。
當人類直接掂到受感染嘅狗狗，或者間接接觸到受真菌孢子污染嘅物品或環境，就有可能中招，尤其係小朋友、老人家、大肚婆等抵抗力比較差嘅人更加係高危一族，要特別小心！
人類感染狗癬嘅典型症狀，係皮膚上面出現紅色、一圈圈（金錢癬）、邊緣凸起而且有少少甩皮嘅患處。
建議如果屋企狗狗確診感染，一定要戴手套處理，將狗狗嘅床、玩具、地板等生活區域徹底消毒清潔，掂完之後要即刻洗手、換乾淨衫，避免將孢子帶入屋企其他角落。
狗癬點樣醫？
為咗幫狗狗快啲好返，避免將病菌惹畀其他寵物或者屋企人，獸醫通常會建議採取積極嘅治療方式。
以下係幾種常見嘅治療方法：
- 藥膏：適合搽喺患處局部，可以幫手舒緩紅腫同發炎，減輕皮膚唔舒服，但通常無法單靠搽膏醫好深層感染。
- 藥浴沖涼：使用含有抗黴菌成份嘅沖涼液幫狗狗全身清潔，可以有效減少皮膚表面嘅真菌孢子數量。
- 口服藥物：藥效可以深入毛囊同皮膚底層，係治療範圍比較大或者抵抗力較差狗狗嘅關鍵方法。療程通常需要 6 – 12 個星期以上，一定要準時食藥並完成成個療程，千祈唔好自己停藥。
- 剪毛（剃毛）：需唔需要剃毛要睇狗狗嘅毛量同感染範圍，短毛狗多數唔使，但長毛或者感染得好嚴重嘅情況下，有時會建議局部剃毛方便清潔同搽藥。
狗癬要幾耐先會好？
如果可以配合獸醫嘅建議進行積極治療，例如搽藥膏、食口服藥、用藥浴沖涼等，通常可以喺幾個星期到幾個月內令病情明顯改善，康復速度都會快好多。
但治療絕對唔可以中途自己停，如果唔係就算表面睇落好返，真菌仲有可能潛伏喺毛囊或者皮膚深層，日後好容易復發，亦會增加屋企人感染嘅風險。
狗狗惹到狗癬點樣照顧？
為咗幫感染狗癬嘅狗狗早日好返，亦減低傳染畀其他動物或者人嘅機會，主人喺日常照顧上必須要特別留意以下幾點：
做好隔離防護
首先，應該將患病狗狗隔離喺乾淨、通風、容易清潔嘅房入面，限制佢嘅活動範圍，避免同其他寵物接觸。
照顧過程中，主人一定要戴手套，處理完之後亦要記得徹底洗手同換衫，並且避免共用狗梳、毛巾、狗床等物品。
環境徹底消毒
由於皮癬菌孢子可以喺環境入面存活好耐，建議每日清潔狗狗經常接觸嘅地板、牆身、狗籠等硬表面，可以用稀釋漂白水（1：10 比例）消毒。
毛巾、床單等布類用品就要用熱水洗乾淨並曬乾，最好每星期最少洗兩次。
避免交叉感染源
帶狗狗出街嗰陣，應該避免去寵物美容院、寵物公園呢類動物密集嘅地方，直到狗狗完全康復為止。
沖涼後保持乾爽
狗狗生狗癬依然可以沖涼，但要用專門嘅藥用沖涼液（洗毛水），搽上身停留一段時間之後（通常係 10-15 分鐘，具體時間請問返獸醫），再徹底沖洗乾淨。
而且幫狗狗沖完涼之後一定要將啲毛完全吹乾，避免潮濕令到病情惡化！
補充皮膚相關保健品
喺營養方面，主人可以考慮幫狗狗補充啲皮膚保健品，例如 Omega-3 （如魚油）等營養素，有助維持皮膚健康同抵抗力。
💡 提醒：如果狗狗本身有敏感、皮膚病等慢性疾病，都應該一齊醫理，咁先可以減低狗癬復發或者惡化嘅風險。
留意狗狗皮膚狀態，遠離狗癬威脅！
狗癬雖然唔係咩絕症，但傳染力極高，如果唔及時處理，好容易惹晒成屋人同其他寵物。
所以透過及早發現異常、睇獸醫確診，並積極治療同做好家居環境管理，狗狗唔單止可以快啲好返，亦可以有效截斷狗癬嘅傳播。等我哋一齊留意狗狗嘅皮膚健康啦！
參考資料
- https://todaysveterinarypractice.com/dermatology/dermatophytoses-in-dogs-and-cats/
- https://www.msdvetmanual.com/integumentary-system/dermatophytosis/dermatophytosis-in-dogs-and-cats
- https://pmc.ncbi.nlm.nih.gov/articles/PMC7396343/
- https://www.petmd.com/dog/general-health/identifying-and-treating-fungal-infections-dogs
- https://www.msdvetmanual.com/dog-owners/skin-disorders-of-dogs/ringworm-dermatophytosis-in-dogs
- https://vet.osu.edu/sites/default/files/documents/Dermatophytosis%20(Ringworm)%2020200123.pdf