溫馨提示：本文用詞已根據寵物食品相關規範作審慎調整，盡可能清晰傳達資訊，感謝各位主人嘅體諒！
貓貓食鮮食好唔好？食得啱就營養又補水！
但係自製貓鮮食仍然有好多竅門要注意，如果營養唔均衡，長期食分分鐘會對貓貓健康造成危害！
如果主人對貓鮮食好有興趣，整之前一定要先了解清楚正確做法，咁先可以確保主子安全無虞，享受到美味嘅鮮食！
貓鮮食點樣整？3大原則缺一不可！
（一）研究清楚貓貓嘅營養需求
貓嘅祖先喺野外狩獵，會食晒成隻獵物，包括內臟、骨頭同肌肉，所以動物性蛋白質就成為咗貓貓最主要嘅營養來源。你可以用去骨嘅肉類作為貓鮮食嘅主食材，例如牛肉、羊肉、雞肉等。
另外要特別注意，有啲重要營養素（例如牛磺酸）貓貓身體冇辦法自己合成，亦會喺烹調過程中大量流失，所以喺自製鮮食時，必須添加適量嘅貓用營養補充劑，確保營養全面。
- 離胺酸
- 牛磺酸 (Taurine)
- 魚油 (Omega-3)
- 綜合維他命
- 礦物質
- 鈣質
製作前最好先諮詢獸醫或寵物營養師，確認食譜符合你主子嘅營養需求，咁先可以調配出食得安心又健康嘅鮮食！
（二）避免有害嘅食材
- 朱古力
- 洋蔥
- 蔥
- 蒜頭
- 韭菜
- 辛香料 (辣椒、胡椒等)
- 酒精
- 蘋婆（鳳眼果）
- 提子 (葡萄)
- 煮熟嘅骨頭
- 生雞蛋
同時要避免過多碳水化合物 (例如白飯、薯仔)，因為貓係肉食動物，天生消化碳水嘅能力較差，食得太多會對肝臟同胰臟造成負擔，長遠可能引致肥胖或糖尿病等問題。
延伸閱讀：
（三）選擇安全嘅烹調方式
貓貓嘅食物唔可以好似我哋咁多油多鹽，所以用大量油嘅「炸」、「爆炒」等方法就絕對唔適合。
肉類最好嘅煮法係清蒸、水煮，亦可以唔加油或落極少量優質食油（如橄欖油）慢煎嚟增加香氣。海鮮類就可以用低溫蒸煮或烘烤，因為太高溫會破壞珍貴嘅 Omega-3 脂肪酸。
貓鮮食食譜點樣揀？5步驟判斷好壞！
想知手上份食譜啱唔啱貓貓食，用以下 5 個步驟就可以簡單快速判斷：
第一步：有冇獸醫或營養師認證？
獸醫或寵物營養師可以確保食材同比例滿足貓貓嘅營養需求，所以如果你手上份食譜標明「經獸醫認證」或者係由有專業背景嘅人士設計，基本上會比較可靠。
第二步：有冇跟足 AAFCO/NRC 營養標準？
一份優質嘅貓鮮食食譜會根據呢啲標準去調配，確保貓貓每一餐都食得夠均衡。如果食譜冇提過有參考呢類標準，就要小心考慮。
第三步：食譜係咪太單調？
食譜中嘅食材應該要多樣化而且配搭得宜。理想嘅食譜會有幾種唔同嘅蛋白質、適量脂肪同必需嘅微量元素。
第四步：有冇提供卡路里計算法？
一份理想嘅貓鮮食食譜，應該要提供每份食材嘅卡路里估算，幫助主人控制貓貓每日嘅攝取量，避免過肥或營養不良。
老貓、幼貓、活躍貓定懶瞓貓需要嘅熱量都唔一樣，有咗卡路里估算，先可以為自家主子做適當調整。
第五步：符唔符合你主子嘅身體狀況？
例如老貓牙齒唔好，或者幼貓口腔未發育好，就可以揀泥狀同湯狀嘅鮮食食譜。
有特殊需要嘅貓貓，最好喺獸醫建議下微調食材比例，咁先可以確保主子喺享受鮮食美味嘅同時，食得健康！