貓貓係我哋嘅心肝寶貝，但你知唔知？
就算係完全養喺室內嘅貓貓，都有機會感染寄生蟲。體內外嘅寄生蟲唔單止會影響貓貓健康，甚至可能會透過環境或者同人類接觸而傳播。
所以，了解寄生蟲嘅來源、影響，以及點樣正確杜蟲，係每位主人嘅必修課！
一、貓咪寄生蟲由邊度嚟？感染途徑大解析
寄生蟲嘅傳播方式有好多種，以下係貓貓最常見嘅 5 種感染途徑：
（一）環境污染
寄生蟲卵可能收埋喺貓砂、地毯、傢俬等環境入面，當貓貓舔或者掂到受污染嘅物品時，就有可能感染。
（二）飲食感染
食生肉或者未煮熟嘅肉類都可能帶有寄生蟲。
（三）跳蚤傳播
跳蚤可能會帶住某啲寄生蟲，例如「絛蟲」，當貓貓舔毛嗰陣唔小心吞咗跳蚤落肚，就會感染。
（四）貓媽媽傳染畀貓 B
有啲體內寄生蟲（例如蛔蟲）可以透過胎盤或者母乳傳染畀幼貓（貓 B），所以貓 B 就更加需要定期杜蟲。
（五）戶外活動與接觸
如果貓貓成日出街，或者同其他未杜蟲嘅貓貓玩，感染寄生蟲嘅風險就更高啦。
二、寄生蟲對貓貓嘅影響
（一）體內寄生蟲影響
- 腸胃唔舒服（嘔吐、肚屙、便秘）
- 體重下跌（營養吸收不良）
- 胃口反常（突然極度為食或者無晒胃口）
- 貓貓個肚脹卜卜（貓 B 好常見，可能係感染咗蛔蟲）
- 貧血、啲毛乾爭爭無光澤（例如俾鉤蟲吸血導致）
（二）體外寄生蟲影響
- 皮膚發炎、甩毛、痕癢（跳蚤、疥癬蟲）
- 敏感反應（例如跳蚤口水引發嘅皮膚炎）
- 嚴重貧血（大量跳蚤吸血導致）
- 煩躁不安，成日𢯎同咬自己（感染耳蟎）
如果貓貓出現上面嘅症狀，建議盡快帶去畀獸醫檢查，確保佢哋健康呀！
三、貓咪常見體內寄生蟲
| 寄生蟲 | 影響 | 症狀 |
|---|---|---|
| 蛔蟲 | 腸道阻塞、營養不良 | 肚脹、嘔吐、胃口反常 |
| 絛蟲 | 喺腸道吸收營養，搞到消瘦 | 肚屙、嘔吐、貓貓舐肛門（因為有蟲刺激） |
| 鉤蟲 | 吸血導致貧血 | 肚屙、嘔吐、體重下跌 |
| 心絲蟲 | 影響心臟同血管功能 | 嚴重時可能會引致死亡 |
| 肺蟲 | 影響呼吸系統 | 無胃口、呼吸困難 |
| 膀胱蟲 | 導致膀胱炎 | 屙血尿、尿頻 |
四、貓咪常見體外寄生蟲
| 寄生蟲 | 症狀 |
|---|---|
| 耳疥蟲（耳蟎） | 耳仔超級痕、發炎、潰瘍 |
| 跳蚤 | 皮膚病、嚴重痕癢、帶嚟感染絛蟲嘅風險 |
| 牛蜱（壁蝨） | 吸血導致貧血，傳播血液寄生蟲 |
| 疥癬蟲 | 皮膚超級痕、皮膚結焦 |
五、貓咪杜蟲注意事項！
（一）體內杜蟲
- 杜蟲時間：出世 3 個星期以上就可以杜蟲，之後每 1-3 個月 杜蟲一次。
- 食藥方式：
- 食完飯後 3-4 小時食藥，確保腸胃可以消化藥物。
- 食藥後 5-6 小時內唔好食嘢，避免影響杜蟲效果。
- 特殊體質貓貓（例如奶貓、腎貓、心臟病貓）：第一次用藥前請先問過獸醫。
（二）體外杜蟲
- 杜蟲頻率：建議每 1-2 個月 用一次體外杜蟲藥（滴頸或者噴霧）。
- 滴劑型杜蟲藥：
- 滴藥前後 48 小時內唔好沖涼，避免影響藥效。
- 要滴喺後頸位置，避免貓貓舔到。
買杜蟲藥嘅注意事項
- 請向獸醫診所購買，避免來歷不明嘅藥物影響貓貓健康。
關於貓咪杜蟲藥嘅詳細問題，請睇呢篇：【貓咪驅蟲藥懶人包】驅蟲藥怎麼選？貓咪驅蟲藥費用、功能比較整理 – 怪獸部落
貓咪杜蟲常見問題 Q&A！
Q１：無出街／有定期沖涼，仲使唔使杜蟲？
沖涼並唔可以完全殺死寄生蟲，家貓就算無出街，主人都有機會將蟲卵帶返屋企，所以都係需要定期杜蟲㗎！
Ｑ２：身上見唔到有蟲，都要杜蟲嗎？
寄生蟲體積好細，如果你肉眼都見到時，就代表已經好嚴重喇！
以跳蚤為例，人類肉眼睇到嘅跳蚤只佔成個跳蚤群族嘅 5 %，其餘 95% 嘅蚤卵、幼蚤…等都匿埋喺環境入面，所以就算見唔到，都係要幫貓貓杜蟲㗎～
延伸閱讀：【貓咪驅蟲藥懶人包】驅蟲藥怎麼選？貓咪驅蟲藥費用、功能比較整理
Sale!
Sale!
