本文用詞遵循寵物食品相關規範審慎調整，盡可能清楚傳達資訊嘅同時，避免使用可能產生誤解嘅詞語，感謝主人嘅體諒與理解！
狗狗喘氣好大聲？狗狗呼吸異常症狀咁樣睇
狗狗喘氣其實係一種正常嘅散熱方式，特別係做完運動之後、或者天氣好熱嗰陣出現嘅短促喘氣，多數都係正常現象。
但如果狗狗氣喘嘅情況發生得好密、出現怪聲或者伴隨其他症狀，就可能係身體發出嘅求救信號喇！
狗狗異常呼吸頻率與症狀
一般嚟講，狗狗喺休息狀態下嘅正常呼吸頻率係每分鐘 15 – 30 次，小型犬或者狗 B 可能會快少少，大約 20 – 40 次。
如果你發現狗狗喺安靜嗰陣呼吸明顯變快，休息時呼吸頻率持續高過每分鐘 30 至 40 次，或者比平時嘅基礎值高出 20 次以上，就要特別留意。
其他警號包括：胸部同肚腩起伏得好犀利、無做運動都擘大個口唞氣、鼻哥窿係咁郁、伸長條頸或者雙腳打開好辛苦咁唞氣，牙肉同條脷出現蒼白、藍紫色或者灰白等異常顏色，呢啲都可能係狗狗呼吸異常嘅徵兆，建議盡快睇醫生！
接下來我哋會帶你判斷狗狗係咁喘嘅常見原因、異常行為警號，以及舒緩狗狗氣喘嘅方法，快啲跟住我哋睇落去啦！
狗狗氣喘 6 大情境！可能原因一次睇
（一）老狗一直喘
年紀大嘅狗狗，心肺功能會退化，好容易出現「喘唔停」嘅情況。
常見原因包括心臟病（例如鬱血性心衰竭）、肺癌、慢性支氣管炎等，需要定期檢查心肺健康。
（二）狗狗喘到瞓唔著
狗狗發夢嗰陣（REM 睡眠期）呼吸可能會變快，呢個係正常現象。
但如果半夜喘得好犀利、伴隨呼吸聲變大、條脷顏色變淡，甚至影響到入睡，就可能同環境太熱、肥胖、心肺功能唔好有關。
（三）狗狗係咁震兼係咁喘
當狗狗同時出現「發震 + 氣喘」，好可能係痛楚、焦慮、驚慌或者疾病嘅徵兆。
建議即刻睇獸醫檢查吓有無潛在嘅痛楚或者身體問題。
（四）狗狗好熱係咁喘
氣溫高或者做完劇烈運動之後，狗狗會透過不停喘氣嚟降溫。
但如果出現行路唔穩、體溫升高、條脷變紅、腳軟等中暑症狀，一定要即刻將狗狗移去陰涼嘅地方，並提供清水同濕毛巾幫佢降溫。
（五）狗狗突然好喘 / 係咁喘行嚟行去
如果狗狗「突然喘得好犀利」並且伴隨「不安咁行嚟行去、企唔穩」，要小心可能係呼吸道阻塞、胸腔積水、心肺疾病等急症，建議盡快送院。
（六）狗狗係咁喘兼係咁飲水
如果毛孩出現異常氣喘而且飲多咗好多水、屙尿密咗，可能同庫興氏症（皮質醇過高）有關。
呢個係慢性內分泌疾病，必須經過獸醫診斷同食藥控制。
狗狗喘氣好大聲？小心氣管塌陷疾病
如果狗狗係「喘氣好大聲」，例如唞氣嗰陣發出怪聲或者好用力咁嘅聲，可能同以下幾個原因有關：
- 氣管塌陷：常見於小型犬，喘起上嚟似「鵝叫聲」
- 呼吸道狹窄：例如短鼻狗（法鬥、老虎狗）天生氣道狹窄，容易出現大聲喘鳴
- 有異物：喉嚨或者氣管入面有異物，會令狗狗喘氣好辛苦甚至咳
- 過度興奮：情緒緊張嗰陣都會導致暫時性喘氣加劇
有時候喘氣大聲同「呼吸急促」會同時出現，呢個唔單止同呼吸道問題有關，亦可能係其他潛在疾病導致：
- 痛楚：例如內臟病變、外傷，會導致呼吸加快。
- 呼吸系統疾病：例如狗房咳、支氣管炎、哮喘、肺炎、肺水腫、肺絲蟲感染。
- 心血管疾病：例如心絲蟲病、心臟衰竭，會影響血氧供應。
- 癌症：肺部、氣管或者喉部腫瘤可能會壓住呼吸道。
- 中毒或貧血：紅血球唔夠導致缺氧，都會喘唔停。
- 內分泌問題：例如庫興氏症。
獸醫嘅治療方式會根據病因對症下藥，常見例如：氧氣治療、止痛藥、抗生素、心臟藥、去水丸、做手術、抗寄生蟲藥物、庫興氏症藥物等。
點樣舒緩狗狗呼吸急促？日常護理 7 招
想避免狗狗出現嚴重氣喘或者呼吸困難嘅情況，平時嘅照顧就好重要！
以下係 7 個日常重點，如果做得到，可以大大減少狗狗喘得好辛苦嘅情況：
- 提供良好嘅居住環境：保持室內通風涼爽，避免高溫焗熱，並定期清潔以減少致敏原（例如塵蟎、霉菌）。
- 使用防勒頸型胸背帶（H帶）：短鼻狗因為呼吸道結構特別，需要特別注意佢哋嘅呼吸狀況，可以考慮用防勒型胸背帶代替頸圈。
- 建立穩定、低壓力嘅生活環境：壓力會影響呼吸節奏，畀足安全感狗狗，減少令佢焦慮嘅源頭，亦需要適時阻止狗狗過度激動嘅舉動。
- 定期身體檢查：每年帶狗狗做 body check，老狗或者特殊品種建議每半年一次，及早發現心臟病、肺部疾病等潛在問題。
- 預防呼吸道疾病與寄生蟲：定期幫狗狗打防疫針，同埋食心絲蟲預防藥，避免接觸患病動物。
- 維持適當體重同運動量：肥胖會增加心肺負擔，適度運動可以增強心肺功能，但應該避免過度劇烈運動，特別係天氣熱嗰陣。
- 日常觀察與記錄：平時多啲留意狗狗嘅呼吸頻率、深度同形態，一發現有唔妥就應該及早處理。如果判斷唔到係咪正常，建議用手機拍低氣喘嘅片畀獸醫參考。
參考資料
- https://vetic.in/blog/pet-health/breathing-difficulty-in-dogs-why-dogs-experience-heavy-breathing-and-what-you-can-do-about-it/
- https://www.petmd.com/dog/symptoms/dog-breathing-heavy
- https://www.winston-salem.carolinavet.com/site/pet-health-advice-blog/2024/02/21/heavy-breathing-dog
- https://berthoudanimalhospital.com/blog/dog-breathing-heavily/