市面上嘅狗狗杜蟲藥花多眼亂，到底應該點揀先好？狗狗杜蟲藥除咗分為驅除體內寄生蟲、體外寄生蟲，亦有同時驅除體內外寄生蟲嘅全效配方。
每款杜蟲藥嘅功能、使用方式同價錢都有好大分別㗎！怪獸部落特別整理咗狗狗杜蟲藥嘅詳細比較表，等各位主人可以更了解唔同嘅杜蟲產品！
狗狗杜蟲藥邊度有得買？杜蟲藥幾耐要用一次？狗狗好少出街係咪就唔使杜蟲？
一齊嚟睇吓狗狗杜蟲藥嘅常見問題同功能比較總整理啦！
狗狗常見體內、外寄生蟲
- 常見體外寄生蟲：跳蚤、牛蜱（壁蝨）、毛囊蟲、疥癬蟲、耳蟎（耳疥蟲）……等等。
- 常見體內寄生蟲：心絲蟲、絛蟲、鉤蟲、鞭蟲、膀胱蟲……等等。
如果狗狗唔小心感染咗寄生蟲，可能會出現肚屙、嘔吐、無精神同無胃口等症狀，嚴重甚至會有生命危險㗎！
所以千祈唔好睇小寄生蟲嘅感染力，一定要定期幫狗狗杜蟲呀～
狗狗常見杜蟲藥比較表
狗狗杜蟲藥常見 Q＆A
Q：狗狗有定期沖涼仲使唔使杜蟲？狗狗係咪一定要杜蟲？
要！就算完全無出街、有定期沖涼，都係要杜蟲㗎！
主人只要出過街，就有可能透過衫褲、手袋或者鞋底等，將寄生蟲或蟲卵帶返屋企。
狗狗只要接觸到就有可能感染！
特別係夏天多蚊蟲，心絲蟲感染主要就係透過蚊咬傳播，所以杜蟲藥必須定期使用。
Q：狗狗杜蟲要幾耐做一次？杜蟲藥推介？
通常係 1-3 個月用一次。請參考藥物包裝盒上嘅指示，或者諮詢獸醫～
每款杜蟲藥嘅劑量或者成份唔同，使用方式都會有分別。
所以建議主人參考藥物包裝盒嘅標示，或者直接問吓獸醫。
另外會強烈建議，全年都要幫狗狗食藥 / 滴頸！
雖然夏天天氣比較熱，比較容易有寄生蟲。
但香港同台灣四季溫差變化唔算極大，冬天一樣會有蚊（傳播心絲蟲）、牛蜱同跳蚤。
只係無夏天咁多，所以預防寄生蟲呢件事，應該係長年不間斷咁做，而唔係分季節嘅選擇！
Q：狗狗杜蟲藥會有副作用嗎？會唔會令狗狗唔舒服？
有啲狗狗喺唔小心舐到滴頸嘅杜蟲藥之後，會出現流口水甚至嘔吐嘅情況。
其實呢個唔需要太過擔心，因為大多數適合狗狗用嘅滴劑或者口服藥都係經過安全測試嘅。
流口水或者嘔吐，通常只係藥劑嘅特殊味道引起嘅刺激反應，並無毒性，亦唔會對健康造成危害。
Q：狗狗杜蟲藥劑量有分別嗎？用錯可能會中毒！
每種藥嘅劑量都有分，根據狗狗唔同嘅體重會需要唔同嘅劑量，所以一定要留意產品標示，千祈唔可以搞錯。
如果唔小心將大型狗嘅劑量用咗喺細狗身上，可能會導致劑量過量，引發中毒反應；
相反，如果細狗劑量用咗喺大狗身上，就可能達唔到有效嘅防護效果。
Q：狗狗杜蟲藥喺邊度有得買？
獸醫診所、部份有醫生駐診或者有相關牌照嘅寵物用品店 / 藥房。
因為毛孩嘅體重、年紀同健康狀況都有差異，建議買任何藥物之前都先諮詢獸醫。
亦要記住千祈唔好買來歷不明嘅藥物呀！
根據法例規定，處方杜蟲藥唔可以喺網上隨便買賣。
必須要到有動物藥物販賣許可嘅地方先可以買到。
一般普通寵物店係買唔到處方藥物㗎～
Q：用完外用型（滴頸）杜蟲藥可以即刻沖涼嗎？
唔建議。
因為外用滴劑需要比較長嘅時間先可以透過皮膚吸收。
所以選購滴劑型杜蟲藥時，通常獸醫都會建議使用前後都要避免沖涼或者玩水，以保持皮膚乾爽！
你可能仲想睇......
