本文用詞遵循寵物食品相關規範審慎調整，盡可能清楚傳達資訊嘅同時，避免使用可能產生誤解嘅詞語，感謝家長嘅體諒與理解！
一、狗狗可以食海鮮嗎？聽講食海鮮會敏感？
其實狗狗最常見嘅食物致敏原並唔係海鮮㗎！研究顯示，狗狗對牛肉、奶製品等食物敏感嘅比例仲高。除非你隻狗真係對海鮮敏感，如果唔係，大部份狗狗都可以開開心心咁食海鮮。
狗狗食物致敏原比例
二、狗狗可以食魚、食蝦嗎？有咩海鮮啱狗狗食？
好消息！
狗狗唔單止可以食蝦，仲可以食魚𠻹！
對狗狗嚟講，海鮮唔單止係優質嘅蛋白質來源，仲含有好多對佢哋健康有幫助嘅營養素，例如：
- Omega-3：幫助維持皮膚健康、令毛髮有光澤。
- DHA & EPA：促進大腦發育，維持心血管健康。
- 牛磺酸：有助於保護視力同心臟功能。
（一）狗狗可以食邊幾種魚？
✅ 建議畀狗狗食細條嘅魚（小型魚）。
例如：沙甸魚、鯖魚、三文魚等，都係好好嘅蛋白質、油脂來源。
❌ 避免畀狗狗食大型魚。
例如：吞拿魚，因為佢哋處於食物鏈比較高嘅位置，好容易積聚重金屬（例如水銀），長期食可能會影響狗狗健康。
（二）狗狗可以食蝦嗎？會唔會敏感？
可以！
但要注意，蝦一定要徹底煮熟，因為生蝦可能會有細菌或者寄生蟲，搞到食物中毒。
仲有，一定要剝蝦殼同搣走條蝦尾。呢啲部位好難消化，可能會搞到狗狗啃親（窒息）或者腸塞。
雖然唔常見，但蝦對某啲狗狗嚟講，的確有可能引發敏感反應。第一次餵嗰陣，建議畀少少先，觀察吓狗狗有無異常反應，例如𢯎痕、肚屙或者嘔。
（三）狗可以食帶子（干貝）嗎？
可以！
帶子係高蛋白、低脂肪嘅食材，對狗狗嚟講係一種健康嘅零食。間中餵少少煮熟咗嘅帶子，可以為狗狗提供優質蛋白質，有助佢哋嘅肌肉發展同健康。
不過，就好似所有海鮮咁，應該適量咁餵，唔好加太多額外嘅調味料。
（四）狗可以食魷魚（透抽）嗎？
可以！
魷魚都係一種高蛋白、低脂肪嘅食材，可以間中餵畀狗狗食。
同其他海鮮一樣，適量咁餵，唔好加調味料，就非常適合狗狗啦～
（五）狗狗可以食鮮魷（小卷）嗎？
（五）狗狗可以食鮮魷（小卷）嗎？
同魷魚差唔多，鮮魷（墨魚 / 墨斗）都係狗狗可以食嘅海鮮。
但係因為鮮魷比較韌，消化能力比較差嘅狗狗應該餵少啲，並且隨時留意住佢嘅消化狀況。
三、餵狗狗食海鮮前，要注意呢 3 件事！
想等狗狗安全咁享受海鮮嘅美味，呢三個關鍵步驟絕對唔可以忽略：
（一）打鱗、起骨、剝殼
狗狗係唔會自己𦧲骨或者吐殼㗎！所以餵狗狗食海鮮之前，一定要將魚鱗、魚骨，或者蝦、蟹、貝類嘅外殼完全清走。
煮熟咗嘅骨、鱗片、殼類會變硬，狗狗食咗好容易𠝹傷食道或者腸胃，甚至會有生命危險。
（二）徹底煮熟、食材新鮮
海鮮一定要徹底煮熟先可以畀狗狗食，煮到熟透可以殺死大部份嘅寄生蟲同有害細菌。
另外，生魚入面嘅硫胺酶會破壞狗狗體內嘅維他命 B1，長期食生魚可能會搞到營養不良。只要將海鮮加熱超過 60℃，硫胺酶就會無晒活性。
海鮮食材嘅新鮮度都好重要，唔新鮮嘅食材可能會搞到狗狗肚屙、腸胃炎。
（三）唔好加調味料
最好嘅調味就係完全唔調味！畀狗狗食嘅嘢應該保持天然、原汁原味。任何鹽、醬汁等調味料對狗狗嚟講都係不必要嘅負擔，甚至會增加健康風險。最好嘅做法就係就咁白灼（水煮）。
