貓主子屙尿：四大觀察重點
貓貓排尿嘅行為同狀況，會隨住佢哋嘅飲食習慣（例如食乾糧定濕糧、食量大細）而有唔同。各位貓奴平時就要留意主子嘅如廁習慣，一旦有改變就要打醒十二分精神！
（一）貓貓屙尿頻率
貓貓一日屙幾多次尿？
正常嚟講，貓貓平均一日會屙 2-3 次尿；如果係以濕糧為主食、又或者好鍾意飲水嘅貓貓，一日平均去 3-4 次廁所都仲係合理範圍。
⚠️注意：如果貓貓頻繁出入貓砂盆，但又屙唔出（排尿困難），貓奴要特別小心，呢個好大機會係下泌尿道症候群。
貓貓可以幾耐唔屙尿？應該咁講，如果主子太耐無去廁所，各位家長最好帶佢去檢查吓，咁樣會穩陣好多～
（二）貓砂尿塊大細
尿塊嘅大細係觀察貓貓健康嘅重要指標之一。正常情況下，普通貓尿塊大約好似個網球咁大，但具體都要睇返飲食習慣：
食濕糧為主： 尿塊可能會比普通 size 大少少，因為攝取水份多。
食乾糧為主： 尿塊可能細啲，但都要維持住個穩定性。
⚠️ 留意異常變化：
- 尿塊突然變大：可能同腎臟疾病或者飲得太多水有關，要留意埋有無其他病徵。
- 尿塊變細：可能代表泌尿道有問題，例如尿道阻塞、膀胱炎等，要即刻去睇獸醫。
（三）貓貓屙尿姿勢
貓貓上廁所嘅姿勢，其實透露咗好多健康秘密。學識分清「正常」同「唔正常」嘅姿勢，係每個貓奴嘅必修課，可以幫你及早發現主子泌尿道嘅問題。
點先係正常嘅排尿姿勢？
正常嗰陣，貓貓嘅身體會呈現一個放鬆嘅蹲姿。
背部線條平順、無拱起，全身肌肉係軟淋淋嘅，屁股亦會穩穩咁貼近貓砂。
成個過程睇落好輕鬆自在，屙完之後仲會好從容咁撥砂埋返好。
點先係唔正常嘅排尿姿勢？
如果貓貓屙尿嗰陣覺得痛或者困難，姿勢會完全唔同。
佢嘅身體會變到好繃緊，明顯見到背脊弓起，頭亦會微微垂低。
你可能會見到佢肌肉好僵硬，甚至發出痛苦嘅慘叫聲。
呢個姿勢代表佢正喺度好費力咁屙尿，係膀胱炎、尿道結石等疾病嘅警號，請務必即刻搵獸醫幫手！
貓貓屙尿尾巴震？
貓貓屙尿嗰陣尾巴舉高高兼快速震動，通常係「噴尿」嘅標記行為，用嚟霸地盤或者喺發情期吸引異性，未絕育或者好大壓力嘅貓成日會咁。
不過，呢個亦可能係佢極之興奮或者開心嘅表現，就好似同你撒嬌咁。關鍵係要睇姿勢：企喺度噴就係標記，蹲喺度震多數係情緒表達。如果伴隨住其他唔舒服嘅病徵，就要問吓獸醫喇。
（四）貓尿顏色
貓尿嘅顏色係另一大健康關鍵。以下係常見顏色嘅解析：
- 透明或者淡琥珀色（健康顏色）： 貓尿清澈而且呈淡黃色，代表飲水充足，身體好健康。
- 白色混濁： 表示泌尿道感染，尿入面可能有膿，要即刻去醫院。
- 粉紅色／有血絲： 可能是膀胱炎、泌尿道受傷，甚至係結石搞到出血，建議即刻諮詢獸醫。
⚠️ 注意：如果貓尿呈白色混濁，可能係泌尿道某處發炎流膿；如果係粉紅色或者有血絲，就要擔心係貓膀胱炎或者下泌尿道疾病。
貓貓屙唔出尿？緊急處理 3 部曲
（一） 即刻聯絡動物醫院！
請馬上打電話，話畀佢哋知你有一隻「疑似尿道阻塞、完全屙唔出尿」嘅貓貓正要過去，等醫院可以提早準備。
（二）用最快速度送醫
呢個係一個隨時攞命嘅急症，特別對公貓嚟講，尿道完全阻塞可能喺短短 24 小時內就引發急性腎衰竭、膀胱爆裂或者心臟停頓，死亡率極高。
（三）觀察並話畀醫生知有無以下症狀
- 頻繁出入貓砂盆
- 長時間好用力咁蹲住，但完全無尿屙
- 因為痛而慘叫
- 肚仔好繃緊，唔畀人摸
- 精神極之萎靡、匿埋一邊
請絕對唔好做以下嘅事：
- 唔好等： 唔好諗住「聽日睇吓會唔會好返啲」，時間就係生命。
- 唔好自己撳佢個肚： 咁樣可能會搞到主子膀胱破裂，情況仲嚴重。
- 唔好強行餵水： 喺屙唔到尿嘅情況下，再飲水只會令膀胱壓力更大。
貓貓屙唔出尿，係無任何偏方可以處理嘅，唯一解決方法就係即刻、馬上搵專業獸醫做緊急治療！
點樣令貓貓屙得開心、健康？
（一） 維持貓廁所清潔
貓貓係一種極度愛乾淨嘅生物。
如果你無定時剷屎、無保持貓砂盆乾淨。
主子除咗可能因為唔滿意個環境而周圍亂屙，如果因此而憋尿引發疾病就大件事。
建議每日最少剷兩次屎（早晚各一次），或者用自動貓砂機。
不過自動貓砂機就觀察唔到尿塊狀況，所以最好都係勤力啲親手剷啦！
（二） 用個夠大嘅砂盆
砂盆長度最理想係貓貓身長（連尾巴）嘅 1.5 倍，方便佢轉身同埋撥砂。如果唔夠大，佢可能唔願意去或者亂屙，到時貓貓唔舒服，貓奴亦好痛苦。
（三） 呃佢飲多啲水
因為貓貓以前係住喺沙漠，演化出嚟嘅習慣係唔太會覺得口渴。但如果水份攝取唔夠，好容易會引起泌尿道同腎臟疾病。
各位貓奴可以試吓喺乾糧加濕糧、轉食全濕糧，或者喺水度加啲肉鬆。呢啲都係「呃水飲」嘅好方法呀～
