你屋企有冇試過貓貓不停咁叫、肚瀉、突然冇晒胃口嘅情況呢？
其實貓貓係一種非常敏 (嬌) 感 (貴) 嘅生物，你可能只係遲咗五分鐘返屋企，貓貓都會覺得全身唔妥當！
到底貓貓有邊啲壓力大嘅症狀呢？遇到呢啲症狀嗰陣又應該點樣著手改善？一齊嚟睇下啦！
貓貓都會有壓力大？貓貓壓力大嘅 8 種徵兆
如果出現以下行為，你屋企嘅貓貓可能壓力太大喇：
- 隨處大小便
- 小便情況異常(屙唔出尿、頻密去廁所)
- 過度理毛(脷到甩毛)
- 攻擊、破壞行為
- 食慾、體重下降
- 周圍匿埋
- 肚瀉(屎偏軟)
- 貓貓不停咁叫
溫馨提示：以上症狀只係舉例，冇呢啲行為唔代表冇問題㗎！只要貓貓出現同平時唔同嘅行為，就要特別留意喇！
貓貓壓力來源
貓貓係一種非常敏感嘅生物，任何細微嘅改變，都有機會令貓貓覺得唔自在㗎！以下係兩種常見嘅貓貓壓力來源，如果發現貓貓有行為異常，可以優先諗下最近有冇呢啲改變，有助於規劃之後嘅改善方案！
貓貓壓力來源 1：空間緊迫
為貓貓打造理想嘅生活空間，係維持佢身心健康嘅關鍵。呢樣包括咗充足嘅食物同水、正確嘅貓砂盤擺放、提供減壓設施（例如貓跳台或者對外窗），以及可以匿埋嘅安全地點。
缺乏合適嘅環境，貓貓可能會因為壓力而打交、隨處大小便或者行為問題，唔單止令主人心痛，亦會影響全家人嘅生活質素。
延伸閱讀：【貓貓知識】貓砂選擇全攻略！ 貓奴必修嘅貓廁管理學
貓貓壓力來源 2：環境改變
就算只係將傢俬擺位調整，都有機會令貓貓覺得唔舒服，搬屋、有新成員就更加唔使講啦！
以上嘅情況，除咗避免搬屋、增加新貓口等等，亦都可以借助其他嘢嚟幫貓貓減壓，其中一個好方法就係用貓貓費洛蒙！
延伸閱讀：貓貓費洛蒙係咩嚟？行為師分析作用、副作用同使用方法！
貓貓壓力大點算好？9大居家減壓方法
當發現貓貓有壓力大嘅症狀時，建議第一時間要先搞清楚壓力來源（係咪住嘅環境有變、有新成員等等）同埋先嘗試改善、消除，有需要嗰陣，都請諮詢行為學家嘅協助啦！
減壓植物：木天蓼、蟲癭果、貓薄荷
木天蓼、蟲癭果、貓薄荷等天然植物，本身含有令貓貓產生飄飄然感覺嘅成分。
當中嘅木天蓼內酯同荊芥內酯會刺激貓貓嘅感官，做出碌地、流口水、磨擦等感到幸福嘅行為
貓貓專用輕音樂！
外國音樂家、科學家合力製作專屬於貓貓嘅音樂專輯，經網友實測，有機會舒緩到貓貓嘅情緒，同我哋人類聽到鍾意嘅音樂一樣咁開心
貓貓費洛蒙
貓貓塊面、肉墊、胸部、肛門附近都有腺體分佈，亦分別代表唔同嘅情緒。當中面部嘅費洛蒙係帶有愉悅嘅氣味，所以費洛蒙產品大都係模仿面頰嘅費洛蒙，令貓貓感到放鬆🥰
想知更多【貓貓費洛蒙知識】可以睇：貓貓費洛蒙係咩嚟？訓練師教你認識費洛蒙作用同貓貓壓力來源！
費洛蒙常見問答
Q：費洛蒙會唔會產生依賴性？
費洛蒙係貓貓天然嘅氣味，唔使擔心會產生依賴㗎！
Q：用咗之後會有咩行為改變？
每隻貓對費洛蒙嘅反應都唔太一樣㗎！目前實測嘅個案有：唔再忍尿、情緒比較穩定、變得更嗲等等嘅例子。
互動遊戲
打獵係貓貓嘅天性，善用逗貓棒等羽毛類玩具，可以令家貓體驗到野外嘅娛樂刺激，除咗可以消耗體力、轉移注意力，仲可以達到陪伴嘅目的，一舉多得❤️
🥰當貓貓感到焦慮嗰陣，不妨試下以上9種減壓方法，等小怪獸們日日都有好心情🥰
貓貓壓力大會唔會唔食飯？3個方法幫貓貓搵返胃口！
貓貓喺壓力下可能會拒絕進食。壓力來源包括環境變化（例如搬屋、新寵物加入家庭）、噪音、陌生人探訪等等。呢啲因素可能會令貓貓感到焦慮，從而影響食慾。
1. 畀個安心食飯嘅空間佢
將飯碗放喺安靜、隱蔽嘅角落，遠離人來人往嘅地方，等貓貓可以安心享用。
2. 加少少零食，引誘貓貓食飯！
可以試下加熱濕糧，等香味更明顯，或者揀啲味道濃啲嘅主食罐、零食，吸引佢嘅注意。
3. 懷疑生病？唔好拖，即刻睇獸醫！
如果貓貓連續幾日都唔食飯，或者睇落精神唔多對路，就唔係單純壓力咁簡單，請即刻帶佢去睇醫生，確保身體冇問題。
貓貓壓力大嘅常見問答！
貓貓壓力大會唔會肚瀉？
會㗎！壓力會影響貓貓嘅腸胃蠕動，有時佢哋一緊張，就會肚瀉，甚至引發腸胃炎。
不過除咗壓力，飲食唔恰當或腸道菌叢失衡都可能係肚瀉嘅原因。如果貓貓持續肚瀉、精神唔好，就要特別留意，可能需要獸醫介入㗎！
延伸閱讀：貓貓腸胃炎護理指南：食咩、唔食咩一次過整理 – 怪獸部落
點樣安撫貓貓？4個令佢安心嘅小方法
-
畀佢匿埋：提供紙箱、貓窩，唔好夾硬抱佢出嚟。
-
用輕柔語氣陪伴：有啲貓貓會鍾意畀人輕輕摸塊面或者耳仔。
-
移開刺激源：好似陌生人、新傢俬或者嘈雜聲。
-
自己先冷靜：貓貓會感受到主人嘅情緒，保持穩定最重要。
如果貓貓長時間壓力大、唔食嘢或者有異常行為，建議帶佢去睇獸醫，對症下藥！
