狗仔主食罐 vs 副食罐：點樣分？
想知點樣餵狗罐頭先啱？首先等我哋講解吓咩係主食罐同副食罐啦。
究竟咩係狗仔主食罐？
主食罐係毛孩嘅主要糧食，提供全面營養。佢哋嘅食材種類豐富，確保蛋白質、脂肪、碳水化合物、維他命、礦物質等營養素都好均衡。最重要係，呢啲主食罐普遍都符合AAFCO（美國飼料管制協會）所訂立嘅營養標準，保證食得健康。
咁副食罐又係咩嚟？
副食罐可以當做毛孩嘅零食，因為佢哋嘅食材通常得兩三種，所以營養成分比較單一。通常會撈主食罐或者其他糧食一齊餵狗仔食，主要係用嚟幫助開胃。不過由於味道比較濃，唔建議長期當正餐餵飼，如果毛孩食得太多副食罐做主糧，就好容易搞到佢哋揀飲擇食㗎啦。
狗罐頭對毛孩有咩好處？即睇三大優點！
相比起乾糧，狗罐頭（濕糧）有以下三大好處：
狗罐頭優點一：輕鬆補充身體所需水分
對於一啲唔鍾意飲水或者飲水習慣唔好嘅狗仔嚟講，濕糧比起乾糧含有更高嘅水份，幫佢哋輕鬆補水。
狗罐頭優點二：吸引力爆燈，輕鬆提升毛孩食慾
罐頭濕糧比乾糧有更誘人嘅香氣，大大提高狗仔進食嘅意慾。
狗罐頭優點三：餵狗仔食藥同補健食品嘅秘密武器！
相比普通乾糧，罐頭濕糧對狗仔嘅吸引力高好多！你可以將平時好難餵嘅藥物或者補健食品，溝入濕糧度，等毛孩不知不覺咁食咗，輕鬆搞掂餵藥難題。
狗罐頭點樣餵？最實用餵飼方法教學
餵飼狗罐頭其實冇一個絕對標準，不過通常都建議毛孩要接觸多啲唔同種類嘅食物。齋食主食罐或者齋食乾糧，對狗仔嚟講都唔係最好嘅飲食習慣。所以，普遍都建議以乾糧做主食，再間中用濕糧做輔助，咁樣餵飼你嘅毛孩就最好啦！
乾濕糧混合餵法
將乾糧同濕糧混合，除咗可以增加毛孩嘅水份攝取量，仲可以令乾糧口感更豐富。主人可以根據毛孩嘅喜好同埋適當比例，自行調整餵飼份量。
將藥物同補健食品撈埋一齊餵
如果毛孩啱啱病咗，或者需要其他補健食品去維持身體正常機能，主人可以將藥物或者補健食品，溝入毛孩嘅濕糧食碗度，方便佢哋進食。
單獨餵食主食罐
直接將主食罐放喺毛孩嘅食碗度，等佢哋食就得。不過主人要留意狗仔（尤其係小型犬）每次食嘅份量會唔會過多，可以將罐頭分開兩餐餵，避免食得太多。但係要記住，唔建議直接將罐頭當做毛孩嘅日常正餐㗎。
獎勵零食點樣餵？
如果毛孩表現乖巧，主人間中可以餵吓副食罐或者肉醬等獎勵性零食，但係要留意唔可以太經常餵飼。因為如果食得太多，好容易搞到佢哋營養不良或者揀飲擇食㗎！