你屋企嘅貓主子對紙箱嘅興趣，係咪永遠都高過你特登買俾佢玩嘅玩具呢？
唔使咁快唔開心住喎，其實貓貓鍾意紙箱，係有科學根據㗎！
原因一：紓緩壓力
荷蘭科學家將一班需要適應新環境嘅貓貓分開兩組，其中一組有紙箱，另一組就冇，繼而觀察紙箱對貓貓嘅壓力指數有冇影響。結果發現有紙箱嘅貓貓更快適應新環境，壓力指數亦相對低啲！（完整研究可參考： Will a hiding box provide stress reduction for shelter cats? )
延伸閱讀 >>【訓練師專欄】點樣佈置最啱貓貓嘅屋企環境？等寵物訓練師話你知啦！
原因二：尋找舒適的溫度
貓貓喺30～36℃嘅環境下，唔使額外消耗體力去保暖或者散熱。當佢哋捐入細細個嘅紙箱入面，可以減少熱力流失，幫手提升溫度。呢個亦解釋咗點解貓貓唔只鍾意捐紙箱，連其他雜物入面都一樣咁愛啦！
延伸閱讀 >>貓貓係咪水做㗎？拆解貓貓「軟骨功」嘅秘密！
原因三：狩獵本能
狹窄嘅空間唔單止可以令貓貓感覺安心，仲可以幫佢哋匿埋，提高捕獵成功嘅機會！如果你屋企有網購嘅紙箱，千祈唔好咁快掉咗佢，不如喺旁邊鑿幾個窿仔，等貓貓可以滿足下佢嘅捕獵樂趣啦～
延伸閱讀>>【貓貓知識】仲未識得逗貓？訓練師教你3招變身逗貓大師！
你屋企嘅貓主子鍾唔鍾意紙箱呢？歡迎分享呢個小知識俾其他養貓嘅朋友知啦～
