一、貓咪流眼水嘅 3 大主要原因
（一）鼻淚管阻塞（先天 vs. 後天因素）
咩係鼻淚管？點解會塞住？
貓貓嘅眼水原本應該透過鼻淚管流落去鼻腔度。
但如果呢條管道塞咗，啲眼水就排唔走，積聚喺眼周圍，耐咗就會變成難睇嘅淚痕。
邊啲貓貓特別容易鼻淚管阻塞？
- 短鼻貓品種（例如波斯貓、異國短毛貓/加菲貓、喜馬拉雅貓）：因為鼻淚管比較短，而且彎曲度大，先天就容易塞。
- 曾經感染過貓鼻氣管炎（貓皰疹病毒）嘅貓貓：感染之後可能會導致鼻淚管收窄或者塞死。
- 上呼吸道感染：打乞嚏、流鼻水、發炎都可能會令鼻淚管短暫塞住。
應該點樣處理？
輕微阻塞：可以用暖水整濕棉花棒，由鼻樑向住眼睛方向輕輕按摩，幫手排走眼水。
嚴重阻塞（流眼水 + 鼻塞 + 抖氣聲變大）：需要帶去獸醫診所洗鼻淚管，或者滴眼藥水紓緩發炎。
（二）眼睛發炎或受傷：紅腫、分泌物變多
點樣判斷眼睛係咪發炎？
- 眼仔紅晒，甚至腫起上嚟
- 眼角分泌物變成黃綠色或者杰撻撻（黏稠）
- 貓貓係咁用手𢯎眼，或者狂眨眼
可能嘅原因有三種～
- 結膜炎（細菌或者病毒感染）
- 角膜炎（眼仔受傷，例如玩嗰陣俾貓爪𢯎親）
- 睫毛倒生（睫毛向內生，刮到眼球）
應該點樣處理？
- 輕微紅腫、分泌物唔多：先觀察 1~2 日，可以用無刺激性嘅生理鹽水清潔，如果無改善先睇醫生。
- 眼睛發炎嚴重、分泌物變黃綠色：需要帶去睇獸醫，開眼藥水或者抗生素治療。
- 睫毛倒生：如果嚴重刺激到角膜，可能需要獸醫做手術修正睫毛生長方向。
（三） 環境刺激或敏感：灰塵、貓砂、香水都係元凶！
如果貓貓對眼無紅腫、分泌物又正常，但就係好容易流眼水，可能係環境入面嘅刺激物搞到咁。
- 粉塵多嘅貓砂（例如膨潤土礦砂）
- 空氣清新劑、香水、精油
- 屋企太多塵，無定時打掃
- 煙味、煮餸嘅油煙
應該點樣處理？
- 轉用低粉塵貓砂（例如豆腐砂、紙砂）
- 令屋企空氣保持流通，減少用香薰、避免有煙味
- 每日用濕布抹地、抹傢俬，減少灰塵積聚
Sale!
Sale!
Sale!
二、貓奴注意！呢４種貓貓特別容易流眼水、有淚痕
- 曾經喺街流浪過
- 純種外國血統貓，例如：波斯貓、加菲貓或者面扁扁嘅貓
- 曾經感染過皰疹病毒
- 角膜受過傷，眼球表面可能會睇落濁濁哋（唔透明）
Out of stock
三、點樣判斷貓貓流眼水嚴唔嚴重？
可以先觀察嘅情況（暫時唔使睇醫生，但要留意變化）
- 眼水透明，無臭味或者顏色異常。
- 間中有少少淚痕，但貓貓活動力、胃口全部正常。
可能有問題，建議帶去畀獸醫檢查
- 對眼紅紅地，分泌物變多，眼角積埋啲黃綠色眼屎。
- 貓貓係咁𢯎眼、狂眨眼，或者半瞇住眼唔肯擘大。
- 流眼水超過 24 小時，無任何改善。
- 除咗流眼水，仲出現 流鼻水、打乞嚏、無晒精神。
需要緊急求醫（可能係嚴重感染或創傷）
- 眼睛嚴重紅腫，甚至完全擘唔大。
- 眼角流出 杰撻撻嘅黃綠色分泌物，伴隨臭味。
- 眼睛明顯受傷，例如刮花、流血，或者瞳孔異常。
- 貓貓同時 唔肯食嘢、無晒心機、唔願郁。
帶貓貓睇獸醫前，呢啲資料要準備好！
| 準備項目 | 問題與細節 |
|---|---|
| 貓貓基本資料 | 品種（例如短鼻貓比較容易有鼻淚管問題） 年紀（老貓抵抗力跌，容易發炎） 有無流浪過？（流浪貓比較容易感染病毒） |
| 生活環境與變化 | 屋企有無其他貓？係咪多貓家庭？ 最近有無大掃除？有無用新嘅清潔劑或者轉貓砂？ 屋企有無噴香水、用精油、有人食煙、或者燒香？（可能影響呼吸同眼睛） |
| 飲食與行為改變 | 最近有無轉乾糧、罐頭或者零食？ 有無無胃口、飲水量變咗、係咁舔個鼻？ |
| 症狀詳細描述 | 眼水顏色？（透明 / 黃色 / 綠色 / 啡色） 對眼有無發紅或者腫起？ 有無伴隨打乞嚏、咳、抖氣辛苦？ |
好多眼部疾病嘅症狀都好似，獸醫需要透過貓貓嘅生活習慣同症狀嚟判斷病因。
📝 小貼士
- 千祈唔好自己亂滴眼藥水！ 貓貓對眼好敏感，滴錯藥可能會令病情惡化。
獸醫教路：幫貓貓減少流眼水？呢 4 招一定要試吓！
| 護理項目 | 重點措施 |
|---|---|
| 環境管理 |
|
| 定期清潔眼部 |
|
| 飲食調整 |
|
| 定期身體檢查 |
|
Q&A：關於貓貓流眼水嘅常見問題
Q1. 貓貓流眼水代表佢好傷心？
唔係㗎。貓貓流眼水主要係生理問題，同情緒無關。
Q2. 點樣清走啲淚痕？
貓貓嘅淚痕係因為眼水排唔走積聚而成。以下係簡單嘅清潔步驟：
- 用暖水整濕棉花或者化妝棉輕抹眼周，每日抹可以減少淚痕形成。
- 如果淚痕太勁，可以問吓獸醫用專用清潔劑（避免用太刺激嘅產品）。
- 定時修剪眼周圍嘅毛，防止啲毛拮到對眼。
Q3. 點樣預防貓貓流眼水？
- 保持屋企乾淨企理。
- 定時剪毛同幫佢抹眼。
- 確保飲食健康，避免人工添加劑或者高鹽份嘅嘢食。
Q4. 貓貓得一隻眼流眼水正唔正常？
單邊流眼水可能係因為有嘢入咗眼刺激到，或者局部鼻淚管阻塞引起，如果流極唔停仲有其他異常症狀，就要問吓獸醫啦。
