埃及貓到底係咩貓？神聖又神秘嘅「斑點貓」
埃及貓（Egyptian Mau）係一種擁有天然斑點、身型優雅，而且歷史非常悠久嘅純種貓。
佢哋嘅歷史可以追溯到古埃及文明，嗰陣時仲被視為神聖嘅象徵添！後來經過俄羅斯貴族配種，再傳到去美國，先正式成為現代認證嘅品種貓。
想深入識下呢隻神秘嘅埃及貓？下面我哋會由佢哋個樣、性格、照顧方法到常見問題，帶各位奴才全面解構！
埃及貓嘅外觀特徵
| 特徵 | 說明 |
|---|---|
| 體型 | 中型貓，肌肉紮實 |
| 體重 | 仔約 4.5–7 kg，女約 3–5.5 kg |
| 毛色 | 銀色、古銅（青銅）色、煙灰色為主 |
| 花紋 | 亂中有序嘅天然斑點，大細形狀唔定；連皮膚上面都有斑點㗎 |
埃及貓個額頭有明顯嘅 M 字額花紋，有一對綠色大眼，臉頰位仲有延伸出嚟好似「眼線」咁嘅深色條紋，頸度通常有一圈或者幾圈唔完整嘅「頸鏈紋」。
除咗樣靚之外，埃及貓仲係所有家貓入面跑得最快嘅！呢樣嘢全靠佢哋對長後腳，同埋側腹位延伸出嚟嘅皮膚皺褶，幫到佢哋步幅變大，動作靈活到不得了。
埃及貓嘅性格特質？
埃及貓唔止個樣吸引，性格上面都有好多令人心心眼嘅特質：
醒目又好學
埃及貓以高智商見稱，佢哋可以學識認自己個名，甚至會學開門窗等「神技」。如果你用獎勵式訓練，佢哋好快適應到，性格有啲似狗仔，係互動感十足嘅好夥伴。
忠心又黐人
埃及貓非常之親人，感情好細膩。佢哋會主動喺門口等門、用聲同你「傾偈」，仲成日好似「跟屁蟲」咁黐住你，對屋企人有好強嘅依賴感。
精力充沛、鍾意周圍跳
作為天生嘅運動員，埃及貓最鍾意奔跑、跳躍同攀爬。佢哋精力旺盛，動作敏捷。如果屋企有貓跳台或者可以爬高嘅地方，佢哋就最開心喇！
慢熱、比較敏感
佢哋對聲、氣味或者環境轉變好敏銳。見到陌生人或者去到新地方可能會比較內向，但只要畀啲時間佢哋適應，就會展現出溫柔可愛嘅一面。
鍾意同奴才「傾偈」
埃及貓唔係淨係識喵喵叫，佢哋會用好多種唔同嘅聲嚟表達自己，好似細細聲呼嚕或者特別嘅鳴叫聲咁，令你更容易明主子嘅心意。
埃及貓同其他品種有咩分別？
雖然有啲貓個樣同埃及貓好似，但其實大有不同。睇下呢個表幫你分清埃及貓、孟加拉貓（豹貓）同阿比西尼亞貓：
| 比較項目 | 埃及貓 | 孟加拉貓 | 阿比西尼亞貓 |
|---|---|---|---|
| 斑點分別 | 小而唔規則嘅斑點，連皮膚都有花紋 | 大型玫瑰花斑或者錢幣紋 | 無斑點，每條毛有多段深淺色帶 |
| 體型 | 中型偏細，身手靈活 | 中大型，肌肉感十足 | 中型，身形修長 |
| 歷史背景 | 古埃及血統，神聖之貓 | 現代人工培育，帶有野性美 | 被認為同古埃及貓亦有淵源 |
埃及貓嘅照顧同飼養心得？
想令主子住得開心又健康，由環境、飲食、互動到清潔，每個細節都要留意：
要有活動空間
雖然埃及貓住公寓都 OK，但佢哋好需要向上發展嘅空間，例如貓跳台或者牆上嘅層架。
佢哋好怕凍，冬天最好準備個暖笠笠嘅窩或者毛氈。由於呢個品種比較罕有同昂貴，建議都係採取全室內飼養，咁樣會安全啲。
食得好、飲夠水
貓咪係食肉獸，所以飲食要以高蛋白質為主，亦都要確保佢哋飲水量充足，預防尿道問題。
控制食量都好重要，唔好餵到主子變咗個波，成貓每日份量大約係 ¼ 至 ½ 杯乾糧，再視乎佢嘅活動量嚟調整。
每日都要放電
埃及貓好活潑，每日都要玩夠先會滿足。
建議奴才每日同佢哋玩，例如用逗貓棒、小波或者益智玩具。佢哋甚至會玩「執波」，可以滿足佢哋打獵嘅本能，亦可以增進感情。
定期梳毛同清潔
埃及貓係短毛貓，打理唔算難，但佢哋屬於中度甩毛品種，建議每星期梳一次毛。除咗減少屋企貓毛漫天飛，仲可以幫主子促進血液循環添。
另外都要記得定期剪指甲、抹耳仔同埋刷牙，預防口腔疾病。
埃及貓長唔長命？有咩健康風險？
埃及貓嘅平均壽命大約係 12 至 15 年。如果你照顧得夠細心，有啲主子甚至可以活到 18 至 20 歲！
雖然埃及貓整體嚟講幾健康，遺傳病機率比較低，但奴才仲係要留意呢幾樣健康隱患：
常見健康小毛病
- 牙齒同牙肉問題：中老年貓常見牙周病。日常刷牙同餵乾糧會有幫助。
- 心臟病（HCM）：肥厚性心肌病係貓咪常見嘅遺傳心臟問題，建議定期做超聲波檢查。
- 泌尿系統問題（FLUTD）：好似膀胱炎或者尿結石。要飲夠水，餵濕糧（主食罐）就最好。
潛在遺傳疾病
雖然唔算常見，但埃及貓都有機會帶有呢啲遺傳基因：
- PK 缺乏症：會導致主子出現慢性溶血性貧血。
- 白血球營養不良症：一種神經系統病，通常細細個就出病徵。
- 尿酸鹽尿石症：容易形成特定類型嘅尿路結石。
搵貓舍嗰陣記得問清楚親代有無遺傳病史，仲要定期去做體檢（驗血同心臟超聲波），早啲發現早啲醫。
埃及貓常見 FAQ
Q1：埃及貓會唔會好易甩毛？
埃及貓係中度甩毛嘅，每星期梳 1-2 次毛就可以大大減少屋企啲「毛毛雨」。
而且佢哋係短毛，打理起嚟好輕鬆，只要勤力啲清潔環境，就唔使驚毛髮滿天飛喇！
Q2：埃及貓啱唔啱初學奴才養？
如果完全無養貓經驗，我就唔係太建議第一隻養埃及貓喇，因為佢哋好需要人陪同互動，奴才要付出好多精力同時間。
但如果你已經做足功課，肯花時間同佢玩、觀察佢嘅需要，埃及貓絕對會係一個好窩心嘅選擇！
參考資料
- https://www.petplan.co.uk/cat-insurance/cat-breeds/egyptian-mau.html
- https://www.pdsa.org.uk/pet-help-and-advice/looking-after-your-pet/kittens-cats/egyptian-mauhttps://tica.org/breed/egyptian-mau/
- https://cfa.org/breed/egyptian-mau/
- https://www.petco.com/content/content-hub/home/breeds/cat-breeds/egyptian-mau.html
- https://www.purina.co.nz/find-a-pet/cat-breeds/egyptian-mau