貓貓吐毛係咪正常？
貓貓每日都會用舔毛嘅方式嚟清潔自己，而佢哋條脷上面嘅倒鈎會勾住甩咗嘅毛，並吞落肚。
大部分毛髮會隨住糞便自然排出，但有時會喺腸胃入面積聚，變成一條條濕立立嘅毛球，最後只好靠嘔吐嘅方式吐出嚟。
貓貓喺換毛季節偶爾吐毛球係正常嘅，不過如果你發現貓吐毛頻率變高，一個星期超過 1～2 次，甚至伴隨冇精神、胃口差等情況，咁就要小心可能係「毛球症」喇！
貓咪毛球症係咩嚟？點樣形成？
毛球症係指貓貓體內積聚太多毛髮，冇辦法順利嘔出或排出，結果喺胃或腸道形成阻塞。
呢個問題唔單止會影響消化，嚴重起上嚟會造成腸道阻塞、慢性胃炎，甚至需要做手術處理，最嚴重可能致命。
貓咪毛球症常見症狀
- 頻繁乾嘔或嘔吐異常：貓貓成日想嘔但嘔唔出，或者嘔吐物只係夾雜少量毛髮，甚至出現異常顏色。如果嘔吐物呈黑啡色、黏稠狀，甚至帶血絲就要特別小心！
- 冇胃口同冇精神：腸胃唔舒服會令貓貓唔想食嘢、唔想飲水，亦可能變得冇精神、渴睡或成日懶洋洋。
- 便秘或糞便異常：去廁所次數變少、排便困難、糞便變得又乾又硬，有時會見到糞便中夾雜大量毛髮，甚至因刮傷腸道而有血。
- 肚仔脹或者唔畀掂：當毛球積聚太多，可能導致貓貓肚仔脹氣或唔舒服，一掂佢就避開或反應好大。
- 毛髮變得粗糙冇光澤：腸胃吸收出問題，會影響毛髮健康，令貓貓啲毛變得乾旱、冇光澤，甚至甩毛增多。
- 其他異常行為：有啲貓貓喺吐毛前會慘叫，或出現亂食嘢（例如咬膠袋、紙巾、草）嘅行為。
如果你觀察到貓貓出現以上症狀，建議盡早帶佢去睇獸醫，確認係咪有毛球阻塞嘅風險。
邊啲貓貓容易有毛球症？
長毛貓
好似布偶貓、波斯貓、緬因貓、挪威森林貓等，因為毛量特別多，比短毛貓更容易吞入大量毛髮。
年紀比較大嘅貓貓
隨住年齡增長，理毛動作可能變得更頻繁，但腸胃蠕動會減慢，令毛髮更難排出。
壓力大嘅貓貓
貓貓如果感到壓力、焦慮、沉悶，或有皮膚問題（例如過敏、貓癬、寄生蟲）時，可能會過度舔毛，增加吞毛風險。
有異食癖嘅貓貓
有啲貓會亂食地氈、膠袋、紙巾或毛冷等，呢種行為好容易令毛髮或異物卡喺腸胃。
啱啱生完BB嘅母貓
佢哋會花好多時間幫BB貓清潔，會因此吞落唔少毛髮。
多貓家庭
貓貓之間互相理毛雖然好有愛，但亦會增加食入毛髮嘅機會。
環境唔夠乾淨
如果生活空間灰塵多、毛髮多，貓貓清潔自己嘅頻率都會提高，自然會吞多咗毛。
點樣預防毛球症？5大日常照顧貼士
當貓貓疑似有毛球症，獸醫通常會透過驗血、X光、超聲波或內窺鏡檢查，治療方式包括飲食調整，亦可能用灌腸、瀉劑輔助排毛。
當毛球太大、阻塞嚴重時，甚至必須用內窺鏡或外科手術攞出嚟，對貓貓身體係好大負擔，所以提前預防就非常重要！
學識以下幾個貼士，幫主子維持腸道健康：
- 定期梳毛：短毛貓每星期 2-3 次，長毛貓每日一次。
- 補充水份：用貓用飲水機或餵濕糧，增加貓貓飲水量。
- 高纖飲食：經由適量補充貓草、排毛粉等，補充天然膳食纖維幫助排出毛球。
- 保持環境清潔：勤力吸塵，減少環境中嘅毛髮。
- 增加運動同玩樂：有助貓貓紓緩壓力，減少因沉悶而導致嘅過度舔毛。
化毛膏 vs 排毛粉：邊種排毛產品更好？
- 化毛膏：原理係用礦物油等無法被吸收嘅油脂去潤滑腸道，令毛球更容易隨糞便排出，有輕瀉作用。但部分化毛膏含有添加劑或對貓貓健康有爭議嘅成分，唔建議長期使用。
- 排毛粉：多數由天然膳食纖維製成，例如洋車前子、亞麻籽、南瓜粉等，透過促進腸胃正常蠕動，自然咁將毛髮包裹喺糞便中排出，副作用相對低，但需要配搭足夠水份。
選購建議： 揀排毛產品時，最好揀成分天然、標示清楚、有專利或第三方認證嘅排毛粉，避免人造添加物，咁先可以放心長期使用。
例如益菌排毛粉，用天然植物纖維配搭專利乳酸菌、消化酵素，幫助排毛之餘，仲可以維持腸胃健康！
你可能還想看
參考資料
- https://www.webmd.com/pets/cats/what-to-do-about-hairballs-in-cats
- https://sagamoreanimalhospital.net/blog/why-do-cats-vomit-hairballs-and-how-to-prevent/
- https://www.purina.com/articles/cat/health/digestion/cat-hairball-vomit