主子變老喇？即睇老貓年齡對照表！
最近有好多小怪獸家長問我哋「貓貓變老咗點算」，仲好緊張咁問：「點樣知隻貓開始老？我覺得佢開始唔鍾意跳上跳落…」、「點樣判斷佢變咗貓公公 / 貓婆婆喇？」
我哋好明白各位奴才焦慮嘅心情。好似人一樣，貓貓都會隨住年紀增長而變老，而且佢哋老化嘅速度係快過人類好幾十倍。不過我哋可以多啲留意老貓嘅需求，幫佢哋打造一個舒服又快樂嘅老年生活！
第一步就係判斷貓貓係咪已經步入老年。雖然唔同品種、體型同體質會有分別，但普遍嚟講：貓貓滿 7 歲就進入「熟齡」，10 歲以上就正式踏入「老年」階段喇。
各位家長可以睇下下面呢個貓貓年齡對照表，睇返主子而家相當於人類幾多歲，咁就更了解佢哋嘅身體變化過程！
延伸閱讀：【毛孩知識】犬貓 vs 人類年齡對照表
主子變老嘅瞬間：7 種老化跡象
除咗睇歲數，你亦可以從**微細嘅行為同外表轉變**，睇出貓貓係咪老緊。
以下係老貓常見嘅老化跡象。提提各位家長，有啲跡象可能係病徵嚟㗎，如果有咩唔妥，最好即刻搵獸醫 Check 下呀！
（一）變到好「渴睡」
隨住年紀大，老貓體力恢復得慢咗，所以要花更多時間休息。成日瞓覺係身體機能下降嘅自然反應，代表佢哋已經入咗老年期喇。
延伸閱讀：
（二）毛髮變白
老貓嘅毛會因為色素減少而慢慢變白，特別係臉部、耳仔或者鬚位。皮膚亦會因為老化而變到好乾或者無晒光澤，呢啲都係老貓嘅特徵。
（三）胃口轉變
老貓嘅新陳代謝會減慢，食慾可能會變，體型亦會跟住改變。
有啲貓會因為味覺同嗅覺退化、或者牙齒牙肉痛而唔肯食嘢。如果主子體重明顯跌咗，就要帶佢去睇醫生喇！
（四）跳上跳落有困難
關節同肌肉退化會令主子對腳無力，以前輕輕一跳就上到去嘅窗台，而家可能要諗過度過先敢跳，呢個係行動力減退嘅表現。
（五）眼朦耳聾（視聽力減退）
老人家視力同聽力都會退化。主子可能開始睇唔清楚嘢、容易撞到傢俬，或者你大聲叫佢名佢都好似聽唔到咁。
（六）經常無端端大聲叫
老貓經常嚎叫，可能係患上咗認知功能障礙（Feline Cognitive Dysfunction），即係俗稱嘅「貓失智症」。
呢種病會令主子覺得焦慮、唔識路，因為極度不安而大聲叫，尤其係夜晚會更明顯。見到咁就要搵醫生幫手，對症下藥減輕主子嘅不安感呀。
（七）飲水多咗好多
貓貓腎功能衰退會令佢哋變到好口渴，甚至淨係飲水唔食糧。奴才一定要留意呢種轉變，因為呢個好可能係「腎病」嘅警訊，千祈唔好以為只係普通老化而忽略咗！
老貓照顧咁樣做，晚年生活先安樂
當主子變咗老人家，我哋就要更加細心。你可以從飲食、環境同日常護理入手，幫佢打造一個安心、舒適嘅晚年生活：
（一）定期做身體檢查
首先一定係要定時帶老貓去驗身！
貓貓係隱忍大師，當你見到佢唔妥嗰陣，病可能已經收埋咗好耐。對老貓嚟講，疾病風險高好多，所以密啲檢查係絕對有需要嘅。
建議老貓每半年做一次定期檢查，同醫生商量合適嘅檢查項目，及早發現潛在問題。
老貓健康管理！老貓嘅腎臟健康同去廁所習慣係息息相關㗎！
- 尿量多咗？ 揀啲吸水力勁嘅貓砂，保持乾爽。
- 關節退化？ 揀細顆粒貓砂，減輕踩踏負擔。
- 驚粉塵？ 用低粉塵環保配方，呵護呼吸道。
📌 揀啱貓砂，老貓晚年先過得舒爽！
（二）改裝家中空間
為咗對腳無咁好力嘅老貓，奴才要準備入口較低嘅貓砂盆，或者加個小斜坡，等佢上廁所唔使咁辛苦。
另外，可以喺屋企多放幾個飯碗同水碗，費事佢因為懶行太遠而放棄食嘢飲水。
如果佢跳唔到上最愛嘅窗台，可以用寵物樓梯或者斜坡幫手。等佢知道就算老咗，一樣可以做自己鍾意嘅嘢，咁心情都會好啲！
（三）揀啱老貓專用主食
老貓代謝慢，如果仲跟以前咁餵，好易會變大肥貓！肥胖會加重老貓身體負擔㗎。
建議換做標示「老貓」或者「全齡貓」適用嘅罐罐同糧，並按體重同體質調整餵食量，確保佢哋攝取到啱啱好嘅營養。
（四）幫老貓額外補營養
除咗正餐，老貓亦可以食啲保健品嚟打底。
例如 OK！軟骨素 就係我哋極力推介畀 7 歲以上主子嘅補品。及早保養關節，可以幫老貓維持行動力，等佢哋老年生活都可以「行得走得」！
老貓嘅最後一段路，我可以點樣陪佢？
由相遇嗰刻開始，我哋就知呢段路總有終點。變老係生命嘅必經階段，對主子嚟講都一樣。
有時我哋太唔捨得，想拼命留住佢哋。但係好多家長同我哋分享：如果可以返轉頭，佢哋寧願主子唔使受苦，而係好好陪佢走完最後一段路，將美好嘅回憶收喺心底。
只要你已經盡咗力照顧佢，貓貓一定會感受到你嘅愛。
所以，趁而家仲有機會，盡情抱多啲主子，回應佢嘅需求，珍惜相處嘅每一刻，呢個就係陪伴老貓最好嘅方式喇！
想主子食好肉？即搵怪獸部落！
怪獸部落由研究貓狗飲食習慣出發，知道新鮮原肉先係最幫到主子吸收到豐富營養、食得最開心嘅嘢。
所以我哋堅持用 100% 全鮮肉配搭原型食材，整出超過 30 款口味嘅優質食譜。無論主子幾多歲，我哋都想陪佢健康快樂成長！各位家長，我哋下次見～
