點樣判斷貓貓有無異食癖？
Hello 各位小怪獸家長！你有無發現屋企主子好鍾意咬膠袋、紙箱、叉電線呢類奇奇怪怪嘅日常用品，甚至仲試過幾次差啲吞埋落肚？
你要小心喇，呢個可能唔係「主子愛亂食」咁簡單，而係患上咗一種叫做「異食癖」嘅病！
要判斷貓貓係一時唔小心（誤食）定係真係有「異食癖」，你可以密切觀察佢嘅行為。如果貓貓只係玩嗰陣唔小心食咗落肚，咁就係「誤食」；但如果佢係重複、有目的地去啃食某啲特定材質嘅嘢，咁好大機會就係「異食癖」喇！
點解貓貓會有異食癖？原來同身心健康有關？
當發現主子有異食癖，好多家長第一時間會覺得佢係喺度「搞搞震」，但其實佢哋唔係專登亂食嘢㗎。大多數異食癖嘅成因都同「身心出咗狀況」有關！
各位家長喺急住想幫佢「戒口」之前，不妨花少少時間觀察吓主子有無以下呢 3 種狀況，咁先可以對症下藥，徹底解決亂食嘢嘅問題呀！
（一）心理因素
任何令貓貓覺得焦慮、緊張嘅因素，都有機會引發異食癖。佢哋會透過咬嘢嚟發洩壓力，例如係**屋企環境轉變、精力無位放、或者長期餓肚仔**等等。
（二）生理因素
當貓貓病咗、**營養唔均衡，或者長期缺乏某種營養素**嗰陣，佢哋會傾向去舔或者食一啲唔尋常嘅嘢嚟滿足身體需要，呢樣亦都係異食癖嘅常見成因。
（三）基因遺傳
有研究指出，**特定品種嘅遺傳基因**都有影響。好似暹羅貓、緬甸貓呢類有東方血統嘅貓咪，相對上會比較容易中招。
貓貓食咗異物有咩病徵？
有啲家長覺得「由得佢啦，食少少唔會有事」，咁樣諗真係好危險㗎！
異食癖好容易搞到異物阻塞腸道，進而出現嘔、肚痾、便秘、或者成身無晒神氣等病徵。嚴重起上嚟仲會引起腸胃發炎、急性腎衰竭甚至中毒，所以各位奴才千萬唔好輕視呀。
（一）消化道病徵
-
持續性嘔吐：呢個係最常見嘅反應。主子可能食乜嘔乜，甚至連飲啖水都會嘔返出嚟。
-
無晒胃口：對最愛嘅嘢食都無晒興趣，呢個係身體極之唔舒服嘅表現。
-
肚痾或者便秘：腸道被塞住咗，排便自然會出問題。
-
肚仔痛：當你想摸佢個肚嗰陣，佢可能會因為痛而「哈」你、低吼或者特登避開。
（二）精神與行為轉變
- 無厘神氣、虛弱：成日好似瞓唔夠咁，死蛇爛鱔，唔想行嚟行去。
- 異常流口水：特別係當異物卡住喺口腔或者食道位嗰陣。
- 捐埋一邊匿埋：呢個係貓貓覺得好痛或者唔舒服嗰陣，最本能嘅防禦行為。
特別危險嘅 3 種「攞命」異物！
雖然吞咗咩都係危險，但下面呢幾樣嘢真係「致命傷」，一中招風險極高：
-
線狀嘢（最危險！）： 毛線、棉線、鞋帶、牙線、逗貓棒條繩等。呢類線狀嘢好易喺腸入面纏繞打結，好似把鋸咁，隨住腸道蠕動而不斷「割」傷腸壁，搞到腸道壞死或者穿孔，引發致命嘅腹膜炎。
-
吸水會變大嘅嘢： 好似棉花、海綿、成團廁紙咁。入咗消化道之後會吸水膨脹，直接將腸道完全塞死。
-
尖銳物品： 例如碎骨、針、魚骨，可能會直接插穿食道、胃部或者腸道。
貓貓食咗異物點算好？緊急處理 SOP
-
保持冷靜，即刻聯絡獸醫： 請馬上打畀最近嘅動物醫院或者24 小時急症室，講清楚主子食咗咩、大約幾時發生。
-
千祈唔好自己幫佢催吐或者畀藥： 絕對唔可以喺無獸醫指示下，自己試幫佢扣喉、催吐或者餵瀉藥，咁樣隨時會整死佢。
-
千祈唔好拉扯露咗出嚟嘅線頭： 如果你見到主子嘴巴或者肛門有線頭露咗出嚟，千萬、千萬、千萬唔好拉！ 條線另一端可能已經纏死咗喺腸道入面，你一拉，內臟就會被嚴重撕裂。
-
盡快送院： 呢個係唯一救到佢嘅方法。獸醫會透過影 X 光或者超聲波確認位置，再決定要唔要做手術。
點樣改善貓貓異食癖？第 5 招奴才一定要知！
（一）搵出原因並針對改善
諗下生活入面有無令佢壓力大嘅嘢。例如搬屋、新傢俬、屋企多咗人或者貓砂盆太污糟。盡力幫主子改善環境，等佢慢慢適應。
（二）增加空間豐富度
整多啲活動空間可以減低主子心理壓力。建議貓爬架垂直高度要有 180cm 以上，整多啲爬上爬落嘅路線，等主子可以自由活動，又有得安心匿埋。
（三）將危險嘢「收埋」
將容易被主子咬嘅嘢收好。例如改用布袋代替膠袋，或者喺嗰啲嘢面頭噴啲主子唔鍾意（但無害）嘅氣味，等佢唔敢行埋去。
（四）幫主子紓壓
（五）用排毛產品幫手排走異物
如果主子真係好鍾意咬線、咬毛，可以用益菌排毛粉嚟補充膳食纖維、益生菌同埋消化酵素。咁樣可以幫助腸胃蠕動，等主子可以透過天然方式將一啲微細異物連埋便便一齊排走，保護腸胃健康！
