點解貓貓對住窗外會咯咯聲？其實…貓貓係度進行緊一場「空氣狩獵」嚟㗎！
呢種行為其實就係「真空行為 Vacuum activity」，普遍嚟講，係指動物受到外界環境刺激嗰陣，會作出相應嘅行為。舉個簡單例子：當你聽緊音樂嗰陣，受到感官刺激不自覺咁興奮，開始搖擺、刷空氣結他；又或者貓貓對住你份晚餐黑面，做出撥沙嘅動作等等，呢啲全部都係真空行為嚟㗎！
常見四類真空行為
（一）貓貓對住雀仔咯咯聲
貓貓其實係模擬緊咬斷獵物條頸嘅動作，只不過個口冇獵物，所以上下兩排牙齒互咁震、發出咯咯聲。通常見到呢種情況，多數係因為屋企隻貓滿足唔到佢哋捕獵嘅慾望，而產生出嚟嘅一個假想行為嚟㗎！
（二）貓貓想撥走食物
當貓貓對住你份食物做出撥沙動作，其實唔係嫌份食物好似便便咁臭咋！只不過係因為佢哋嘅祖先喺野外生存嗰陣，習慣咗將糞便同食物埋藏，隱藏自己嘅蹤跡。雖然佢哋已經係家貓，冇晒天敵威脅，但係聞到啲味比較濃嘅嘢，都仲會做出撥走嘅動作。
（三）狗狗R被竇
狗狗祖先喺野外瞓覺嗰陣，會喺地下R個位，貪泥土下面暖笠笠又舒服。雖然你隻狗狗變咗家犬後有暖竇，但佢哋仍然保留住R地嘅天性。
（四）貓貓啜被、踩踏踏
「真空行為」要唔要糾正？
首先可以留意吓，發生嘅頻率同強度高唔高？有冇整傷自己（例如：貓貓啜肉墊啜到流血）？如果頻率正常，咪當佢可愛囉，影多啲相留念啦！但如果發生得太密，甚至整傷咗，就要帶佢去睇醫生檢查，因為可能就唔係咁簡單嘅「真空行為」喇！
