貓貓咬人點算好？呢個係好多貓奴常見嘅煩惱，特別係貓貓突然開始亂咬，甚至同你玩到一半嗰陣，無啦啦大大力咬到你痛一痛。
其實，貓貓咬人有 4 大常見原因，包括打獵本能、撒嬌、抗拒被摸、甚至係壓力問題，只要掌握 3 個簡單方法，就可以令你隻貓貓唔再亂咬，保護你嘅手腳唔再受傷！
一、點解貓貓會咬人？4 大原因／解析
（一）玩緊打獵遊戲
如果貓貓嘅生活入面無可以畀佢進行狩獵嘅目標，咁就好大機會將打獵行為轉移去主人身上㗎啦！
諗吓你係咪成日喺貓貓玩緊嗰陣去摸佢呢？ 好多時貓貓輕咬，只係覺得你同佢玩緊遊戲、表達開心嘅反應啫～
（二）唔想畀你摸
當你摸到貓貓嘅「禁區」時（每隻貓貓都唔同，可能係個肚、後腳或者耳仔等部位），又或者佢覺得你摸得太耐啦（時間長短由貓主子話事），貓貓都有可能發脾氣㗎～
如果貓貓唔想被摸，就會透過輕咬嘅方式嚟話畀各位奴才知：「夠啦！」、「唔好再摸啦！！」、「停手呀！！！」
（三）撒嬌、想引你注意
貓貓唔單止會用「喵喵叫」嚟表達需求，仲會透過咬人嘅方式去吸引主人嘅注意力㗎！
如果貓貓係輕輕含住你隻手，伴隨住「咕嚕咕嚕」聲、用個頭去蹭你，或者攤喺度輕咬，呢種唔太痛嘅咬人行為，就可以當做係貓貓撒緊嬌、同你示愛啦～
（四）自我防衛（真係想咬你）
貓貓通常會因為唔信任、受驚等情緒而做出攻擊行為，可能以前曾經有被體罰、被強迫嘅經歷。
一般呢種攻擊行為，會伴隨住尖叫、哈氣（發出嘶嘶聲）或者低吼，而且咬嘅力度非常大，被咬到嘅手腳可能會留低好深嘅牙印㗎！
⚠️ 注意：如果係防衛性嘅攻擊行為，建議諮詢犬貓行為訓練師，針對個別情況進行訓練同改善呀！
二、貓貓咬人嗰陣，呢 4 個錯誤反應要避免！
（一）唔好大聲鬧
貓貓咬人點算好？ 如果你隻貓突然開始亂咬，你可能會想大聲鬧佢或者懲罰佢，但咁樣反而會令貓貓更加有壓力，甚至變本加厲。
咁應該點樣令貓貓學識「唔好亂咬」呢？ 正確嘅方式係用正面引導，令貓貓明白「咬人 = 無得玩」，咁先可以真正改變佢嘅行為。
（二）唔好抱走或者推開貓貓
有啲主人畀貓咬就會將貓貓抱走，或者推嚟推去，不過咁樣只會令貓貓以為你同緊佢玩，覺得好好玩呀～
（三）唔好避嚟避去
閃避、縮嚟縮去嘅手腳簡直就係人體逗貓棒！ 你嘅手腳睇落就好似一個獵物咁，更加容易被當成目標而受到攻擊。
（四）絕對唔可以體罰
三、點樣話畀貓貓知唔可以咬人？3 個有效訓練方法
方法一、 唔好再用手腳陪玩
就好似上面所講，揮動中嘅手腳好容易被貓貓當做獵物。當貓貓想玩嗰陣，就會行埋嚟撲咬你嘅手腳。你可以揀多啲唔同材質、唔同大細嘅玩具嚟吸引貓貓注意，喺成功轉移佢視線嗰陣亦可以畀啲獎勵㗎！
方法二、即刻停玩，採取冷漠態度
畀貓貓咬嗰陣，你任何嘅肢體動作或者回應，都可能令貓貓覺得好有趣、特別好玩，例如：突然縮開手腳、手腳喺佢面前揮舞閃避等等。所以主人一定要冷處理、即刻停止遊戲並且無視佢哋，等佢哋明白「咬人＝無得玩！」
方法三、增加環境豐富度
建議主人喺屋企佈置貓貓嘅垂直空間（180cm高），例如設置貓爬架、貓跳台等等，或者豐富貓貓嘅活動路線，例如貓咪隧道、唔同形狀嘅貓抓板同睡窩。
另外，畀貓貓望吓窗外嘅風景都係好正嘅減壓方式㗎！ 總之就係要豐富生活環境，滿足佢哋探險嘅天性，等佢哋轉移注意力，就唔會再將咬人當做樂趣，減少貓咬人嘅次數啦～
四、貓貓咬人好大力點算好？咁做令佢學識控制力度
（一）貓貓咬人好大力嘅原因？
貓貓咬人嘅原因有好多，但「咬得好大力」通常係因為以下幾種情況：
| 原因 | 原因說明 | 解決方法 |
|---|---|---|
| 太過興奮，玩到太 high | 小貓仲未識控制力度，將你隻手當做獵物咁玩。 | 玩過龍就停低，等貓貓學識控制力度。 |
| 摸得太耐，覺得唔耐煩 | 摸到一半突然咬人？貓貓覺得夠啦，用咬嚟制止你。 | 觀察貓貓嘅警告信號，一見到佢唔耐煩就即刻停手。 |
| 壓力太大，心情唔好 | 搬屋、有新寵物、屋企有變動，貓貓用咬人嚟表達不安。 | 畀貓貓一個安全空間，用費洛蒙噴霧或者陪多啲佢玩嚟安撫。 |
| 唔鍾意被限制活動 | 抱貓、剪指甲、餵藥嗰陣，覺得受威脅而反抗。 | 避免強迫貓貓，用漸進式訓練，等佢習慣呢啲動作。 |
| 身體唔舒服，可能病咗 | 突然變得鍾意咬人，可能係牙痛、關節痛，建議睇獸醫。 | 檢查牙齒同身體狀況，有異常就帶去畀獸醫睇。 |
（二）點樣改善貓貓咬人好大力嘅行為？
| 解決方法 | 說明 |
| 幫貓貓學識「輕咬」 | 咬得太大力嗰陣，即刻停止遊戲，等貓貓知道「咬人＝無得玩」。可以用高音講「呀！」令貓貓意識到咁樣咬係唔啱嘅。 |
| 提供合適嘅咬咬玩具 | 畀貓貓可以「大力咬」嘅嘢，例如磨牙棒、軟膠玩具。避免直接用手同佢玩，防止佢誤會「手＝獵物」。 |
| 避免過度撫摸或者刺激 | 觀察貓貓嘅「警告信號」（條尾揈嚟揈去、耳仔向後摺（飛機耳）、瞳孔放大、肌肉僵硬），一見到就即刻停手。 |
| 穩定貓貓情緒，減輕壓力 | 如果環境有變動（換主人、新寵物等），提供安全空間。用費洛蒙噴霧，同埋陪多啲佢玩去增加信任感。 |
| 觀察有無身體唔舒服，有需要就睇獸醫 | 如果貓貓突然變得鍾意咬人，可能係牙痛或者關節炎。檢查口腔同身體狀況，有異常就帶去睇獸醫。 |
（三）畀貓咬到流血點算好？
貓貓咬到見血，請務必保持冷靜並即刻處理傷口。
貓嘅口腔細菌多，傷口雖然細但好深，感染風險好高。
請即刻用大量梘液同流動清水，徹底沖洗傷口最少五分鐘，可以輕輕擠壓等少少血流出嚟，幫手排走啲細菌，再用碘酒或者火酒消毒，然後用紗布包紮。
如果傷口係深嘅穿刺傷、無辦法止血，或者之後出現紅腫熱痛等發炎症狀，請務必去睇醫生！
並確認需唔需要打番支破傷風針。
（四）貓貓咬人可唔可以打？
貓貓咬人絕對唔可以打！體罰係無效而且極具破壞性嘅訓練方式。
貓貓無辦法理解「畀人打」同「咬人」之間嘅因果關係，佢只會學到「你隻手好得人驚」，繼而對你產生恐懼，徹底摧毀你哋之間嘅信任感，甚至可能因為驚而誘發更強嘅防禦性攻擊。
正確嘅做法係喺被咬嗰一刻，發出短促、嚴厲嘅聲音（例如「唔得！」）嚟喝止佢，並且即刻停止所有互動、起身走開，等佢明白「咬人 = 所有開心嘢都會完結」。
