主子平均一日要瞓成 13-16 個鐘，有啲直頭可以每日瞓超過 18 個鐘添！
但你有無發現，當佢哋瞓到「死豬」咁嗰陣，個身會輕微抽動、鬚震震，甚至發出啲怪聲？呢啲神秘小動作，其實就係貓貓正在「做夢」嘅證據！
貓貓睡眠階段：同人類一樣會入夢！
科學研究發現，貓貓嘅睡眠模式同人類好相似，一樣會經歷三個階段：
（一）淺眠期（Light Sleep）
啱啱入睡嗰陣，貓貓仲係保持住一定嘅警覺性。你會見到佢對耳喐吓喐吓，甚至開少少眼睇吓周圍環境。呢個時候如果有一丁點聲或者郁動，佢哋都會即刻驚醒。
（二）深層睡眠期（Deep Sleep）
呢個階段佢哋個身會完全放鬆，心跳同呼吸都會變慢。呢段時間對佢哋嘅身體修復、增強免疫系統非常緊要。如果貓貓瞓唔夠深層睡眠，係會影響到健康同埋情緒㗎。
（三）快速動眼期（REM 睡眠）
呢個係最得意嘅階段，貓貓嘅眼珠會喺眼皮底飛快咁閃，代表佢做緊夢喇！呢個時候你會見到好多小動作，例如四肢抽動、鬚震震、個嘴仲會𡁻吓𡁻吓咁。人類嘅夢境多數喺呢個階段出現，貓貓都唔例外！
主子夢入面到底見到乜？
雖然科學家仲未可以 100% 肯定佢哋夢到乜，但根據行為學家研究，主子嘅夢境好大機會同佢嘅日常生活有關：
貓貓嘅夢境可能包括：
- 狩獵同埋獵食（夢見自己捉雀仔、追玩具）
- 食好嘢（個嘴𡁻吓𡁻吓，夢到食緊最愛嘅罐罐）
- 童年記憶（好似細個嗰陣匿喺貓媽身邊咁）
- 驚驚嘅回憶（可能夢返起喺街流浪、或者同其他狗對峙嘅畫面）
有趣嘅係，狗仔夢入面通常會有主人，但貓貓就未必有你份喇！
呢個係因為貓貓嘅夢境通常係「獨立行動」，例如探險、獵食，而唔係同人互動。各位奴才，心碎未？😂
點樣判斷主子做緊夢？
如果你見到主子瞓覺嗰陣有呢啲行為，就係入咗夢境喇：
- 鬚震震，好似喺夢入面「感應」緊周圍咁
- 個嘴開開吓，發出「吧唧吧唧」聲（多數係夢到食嘢 😆）
- 眼珠喺眼皮下面飛快咁轉
- 四肢微抽，甚至會用手仔抱住自己個頭
小提醒：千祈唔好夾硬整醒做緊夢嘅貓！
直接叫醒佢其實幾危險，因為佢可能正喺夢入面追緊獵物。你突然摸佢，佢分唔清現實定夢境，好大機會會出於本能攻擊你㗎！你有觀察過主子瞓覺個樣嗎？其實佢哋大部分時間都係淺眠，見到眼珠快閃嗰陣就係佢做緊好夢喇，由得佢啦！
除咗睇夢境同抽動，貓貓嘅睡姿其實都透露緊佢對你嘅信任程度：
縮到成個波咁 → 代表佢仲保持緊警戒心，準備隨時應付突發狀況！
趴喺度瞓 → 代表佢已經開始放鬆，但仲係想留意外面變化。
反晒魚肚、四腳朝天 → 代表佢 100% 信任呢個環境，佢覺得喺你身邊最安全！
你屋企嗰隻平時最鍾意點樣瞓？
貓咪瞓覺位置大揭秘！主子瞓喺邊，代表佢有幾愛你？信任指數大解析！
參考資料