本文用詞遵循寵物食品相關規範審慎調整，盡可能清楚傳達資訊嘅同時，避免使用可能產生誤解嘅詞語，感謝主人嘅體諒與理解！
貓癬係咩嚟？即係貓黴菌嗎？
Hi 各位怪獸家長，今日想同大家傾吓貓貓最常見嘅皮膚病之一「貓癬」！
貓癬又稱貓黴菌（香港多數叫貓金錢癬），學名為貓皮黴菌病（dermatophytosis），係一種由真菌引起嘅皮膚病，傳染性極高，主要感染貓貓嘅皮膚、毛髮同指甲。
最常見嘅致病菌係犬小芽孢菌（Microsporum canis），因為呢類皮膚病喺人體上面通常會呈現一個個圓形嘅紅印，所以俗稱「金錢癬」。及早發現同治療，係避免傳染同惡化嘅關鍵，快啲跟住我哋了解貓癬嘅症狀同埋預防、照顧指南啦！
想了解多啲【貓咪皮膚病】請睇：貓咪皮膚病點算好？4 種症狀與護理重點，一篇解析！
貓癬 / 貓黴菌點樣感染？
貓癬 / 貓黴菌嘅傳播力非常之強，無論係直接接觸貓貓，定係透過日常用品同環境，都有可能感染！
了解傳染途徑，有助我哋更有效咁預防同控制貓癬擴散：
貓癬傳染途徑 1：直接接觸
當健康嘅貓貓同已經感染貓癬嘅貓貓有身體接觸時，例如互相舐毛、玩耍、打交等，都有可能將真菌孢子惹畀對方。
特別係抵抗力比較差嘅幼貓或者老貓，感染風險就更加高。
貓癬傳染途徑 2：間接接觸
除咗直接接觸，貓貓亦有可能透過共用生活用品而間接感染。
例如受污染嘅貓梳、貓床、玩具、毛巾、貓爬架等，只要曾經接觸過患病嘅貓貓而又無徹底清潔消毒，就有可能成為傳播源頭。
貓癬傳染途徑 3：環境傳播
貓癬嘅真菌孢子喺環境入面生命力極強，最長可以存活去到 18 個月咁耐。
特別係喺香港呢啲潮濕、陰暗或者唔通風嘅環境（例如春天回南天），就更加容易助長孢子生存同擴散。
所以一定要加強屋企清潔、保持空氣流通，並定期做消毒，以防交叉感染。
邊啲貓貓特別容易感染貓癬 / 貓黴菌？
雖然唔係每隻貓都會感染貓癬，但有啲體質同生活環境嘅貓風險會特別高。
免疫力同生活環境絕對係關鍵嘅風險因素。
常見嘅高危一族如下：
- 幼貓（貓 B）與老貓
- 患有慢性疾病（例如貓白血病 FeLV、貓愛滋 FIV、糖尿病）嘅貓貓
- 營養不良或者長期食緊免疫抑制藥物嘅貓貓
- 長毛貓（因為毛髮難打理，容易滋生孢子）
- 多貓家庭或者暫託 / 拯救流浪貓嘅環境
- 住喺潮濕、污糟邋遢、唔通風空間嘅貓貓
貓癬 / 貓黴菌嘅常見症狀有邊啲？
由輕微甩毛去到嚴重皮膚發炎，貓癬嘅表現可以好多變，了解症狀有助及早發現同治療。
貓癬嘅潛伏期通常為 7 – 21 日，部份症狀可能需要 3 – 4 個星期先會浮現，常見症狀包括：
- 甩毛（脫毛）：一撻撻圓形或者不規則嘅甩毛位，甚至會全身甩毛
- 皮膚異常：紅腫、結焦、有皮屑、膚色變深或者皮膚變厚
- 毛髮變化：鞋烚烚（粗糙）、易甩、折斷、無晒光澤
- 輕微痕癢：可能會令貓貓係咁舐、𢯎痕，搞到病灶進一步擴散
- 嚴重病變：肉芽腫、潰瘍或者生腫塊（比較少見）
- 常見感染部位：塊面、耳仔、手腳指甲、條尾、背脊、胸部同肚腩
亦有啲貓係「無症狀帶菌者」，雖然無明顯病徵，但依然有傳染性。
例如屋企有多隻貓或者同人類有親密互動時，就算帶菌貓睇落好健康，都有可能透過毛髮或者生活用品將黴菌孢子散播出去，搞到全家一齊中招。
貓癬 / 貓黴菌會傳染畀人嗎？
貓癬 / 貓黴菌係一種有傳染性嘅皮膚真菌感染，唔單止會喺貓同貓之間傳播，亦有可能透過直接接觸或者受污染嘅物品傳染畀人，係常見嘅人畜共通疾病。
- 高危一族：小朋友、老人家或者抵抗力比較差嘅人感染風險會更高。
- 症狀表現：人感染之後通常會喺手腳或者身軀出現紅斑、甩皮、一個個圓形嘅印（金錢癬），而且會好痕。
- 預防建議：接觸患病貓貓時應該戴手套，處理完一定要洗手消毒，並定期清潔環境同用品，減低傳染風險。
- 治療方式：如果懷疑自己中招，應該盡快睇醫生，由皮膚科醫生診斷並使用抗黴菌藥膏或者口服藥治療。
貓癬 / 貓黴菌嘅治療方法與護理建議
針對貓癬嘅有效治療需要結合藥物、環境同營養護理三管齊下，先可以真正控制感染同避免擴散。
💡貓癬治療流程懶人包：
- 帶貓睇獸醫，確認係咪真係生貓癬
- 跟足獸醫指示剃毛、搽藥膏 / 食藥
- 每日清潔環境＋用稀釋漂白水消毒
- 加強營養補充、避免再次感染
- 定期覆診同做真菌檢查，確認係咪已經好返
雖然貓癬有機會自己痊癒（大約 3 – 5 個月），但如果處理得唔好可能會擴散或者變成慢性皮膚病，所以強烈建議一定要搵獸醫進行專業治療。
詳細治療分為以下幾個方面：
藥物治療
- 局部治療：藥膏、洗毛水、藥浴（例如 Miconazole、硫磺水 Lime Sulfur），要戴頭罩（伊麗莎白圈）防止貓貓舐到。
- 口服治療：用於大範圍或者嚴重感染（例如 Itraconazole），必須遵從醫生指示服用。
- 剃毛：有助藥物吸收同控制傳染範圍。
環境消毒
- 每日吸塵或者抹地
- 用稀釋漂白水消毒（建議 1:10 或 1:30 比例，視乎產品指引）
- 隔離感染咗嘅貓貓，盡量唔好用地毯、保持空間通風乾爽
營養與免疫力護理
- 補充維他命 B 雜、Omega-3（例如魚油）、鋅同蛋白質
- 適度曬太陽，有助殺菌同維持免疫力
Q：醫貓癬要使幾多錢？
治療貓癬嘅費用會因為唔同嘅獸醫診所而有分別，一般嚟講，包埋診金同藥費，大約會係幾百至二三千蚊港紙左右。
如果同時再買啲保健品，總數就比較難估計，最準確嘅方法都係直接問獸醫診所報價。
貓癬 / 貓黴菌點樣預防？貓咪黴菌幾耐先會好？
貓癬接受治療之後，通常喺 2 – 3 個星期內會開始見效，要完全好返可能需要 1 – 2 個月時間，視乎每隻貓嘅體質而定。
就算成功醫好，都有再次感染嘅可能，所以建立預防機制先可以令貓貓遠離黴菌困擾！建議：
- 保持良好營養同抵抗力
- 避免再次接觸感染源頭
- 定期消毒環境同做檢查
貓癬 / 貓黴菌常見問題 Q&A
各位主人對貓癬經常有好多疑問，以下整理咗最實用嘅 Q&A 一次過解答大家：
Q1：貓癬會唔會復發？
A：有機會。
就算醫返好，如果抵抗力差咗、生活環境無改善，或者再次接觸到受感染嘅貓或物品，依然有機會復發。
維持良好健康同環境衛生，係減低復發風險嘅不二法門！
Q2：貓癬會唔會致命？
A：唔會。佢係一種醫得好嘅皮膚病，但如果處理得唔好，可能會長期反覆發作，令貓貓好辛苦。
Q3：中咗貓癬係咪一定要隔離？
A：要，以防傳染畀屋企其他寵物同埋人。
Q4：人惹到貓癬要醫幾耐？
A：大約一個月左右，需要睇皮膚科醫生診斷同持續搽藥。
治療期間應該避免接觸其他寵物或者同屋企人共用毛巾、床單等，以免惹畀人。
Q5：貓癬 / 貓咪黴菌會唔會自己好？
A：一般嚟講，如果貓貓本身健康、抵抗力正常，貓癬的確有機會靠自己痊癒，但通常要捱好幾個月時間。喺呢段期間，貓貓會因為皮膚又紅又痕而覺得好唔舒服。
更重要嘅係，貓癬會傳染畀其他貓貓同人，所以除非真係無辦法帶佢睇醫生（例如流浪貓好難捉、或者隻貓太惡唔畀人掂），如果唔係絕對唔建議由得隻貓「自己好」。
大部份情況下，積極治療一定係比較安全，亦可以減低傳染畀其他貓貓嘅風險。
Q6：貓癬有無疫苗可以打？
A：市面上確實有「皮黴菌疫苗」可以打（香港需向相熟獸醫查詢供應情況）。
但要留意，呢種疫苗唔係用嚟預防貓癬，而係貓貓感染咗之後嘅輔助治療。
佢可以幫手令病情無咁嚴重，或者縮短康復時間，但就無辦法完全避免感染。
Q7：人類嘅黴菌感染會唔會傳染畀貓？
A：有啲人類常見嘅黴菌感染，例如頭癬、香港腳，的確有可能傳染畀貓，但機率唔算高。
另外，貓貓毛髮濃密，會透過舐毛或者甩毛將黴菌孢子散播到周圍環境，增加傳染畀人或者其他動物嘅風險。
而人類感染時，多數只係黴菌停留喺皮膚或者指甲角質層，比較難大量散播。
預防勝於治療，貓癬並唔可怕！
貓癬雖然常見又容易傳染，但只要及早診斷、配合獸醫治療、徹底消毒環境，再加埋營養同悉心照顧，大部份貓貓都可以完全康復。記得畀多啲耐性同關心貓貓，一齊戰勝貓癬啦！
如果你覺得呢篇文章有用，歡迎 Share 畀身邊有養貓嘅朋友！亦都提提大家，有任何疑問時，最穩陣都係盡快搵獸醫尋求專業意見。
參考資料
- https://vcahospitals.com/know-your-pet/ringworm-in-cats
- https://www.petmd.com/cat/conditions/skin/ringworm-in-cats
- https://www.msdvetmanual.com/cat-owners/skin-disorders-of-cats/ringworm-dermatophytosis-in-cats
