一、主子屙完屎暴衝：「解便 High」係真有其事！
原因 1：心情爽到飛起（解便嗨）
有啲貓貓淨係屙完大個嗰陣先會突然「失控」周圍衝，日本就將呢種行為叫做「うんこハイ」，即係「便便 High」（解便 High）。
有人話係因為主子排便完之後有一種舒暢感同成就感，亦都有科學家認為係排便嗰陣，交感神經同副交感神經互相作用，令佢哋產生一種生理上嘅興奮感呀！
原因 2：對個廁所唔順眼
貓貓對廁所嘅要求其實好高㗎！
只要有一點點唔滿意（例如：砂盆太污糟、太細個、擺位唔啱等等），佢哋可能屙完就即刻想「逃離現場」，嚴重嘅話甚至會忍住唔屙添！
原因 3：陣味臭到想逃跑
「天呀好臭呀！！！」就算埋好咗砂，主子仲係覺得陣味臭到冤，當然想第一時間鬆人，留返畀奴才你慢慢清理啦～
你主子鍾意而家用緊嘅貓砂嗎？到底貓砂應該點樣揀呢？
原因 4：屙完衝走，係怕被天敵發現？！
喺野外，貓貓嘅排泄物會留低氣味，唔單止會吸引獵物，仲好易暴露自己嘅位置畀天敵知。
所以，有啲貓貓仲保留住呢種「天生生存本能」，覺得屙完一定要 快啲離開現場，費事被獵食者昅中。
二、主子去完廁所一直叫？
有啲主子去完廁所會大聲喵喵叫，叫到你好似以為佢喺度召喚緊外星人咁。
呢個行為可能有幾個原因：
原因 1：想你理吓佢（求關注）
主子可能從生活經驗中學到咗：「只要我一叫，奴才就會過嚟睇我」或者「只要我一叫，就有奴才幫我鏟砂」。
所以主子一直叫，可能係想講：「快啲嚟鏟屎呀！」、「過嚟睇我屙得幾靚！」，純粹係想使喚奴才或者吸你關注啫～
原因 2：身體唔舒服
如果主子邊去廁所邊發出低沉、痛苦嘅喵叫，甚至出現頻尿、想屙又屙唔出、尿入面有血等狀況，好大機會係膀胱炎、尿道阻塞或者腎臟有事，一定要即刻帶去睇獸醫！
原因 3：想你即刻清砂
有啲貓貓係極度「潔癖控」，習慣用叫聲嚟通知你：「奴才！夠鐘鏟屎喇！」
三、主子企喺度屙／屙咗喺砂盆外面？
原因 1：個砂盆太細
當主子唔鍾意而家用緊嘅貓砂或者砂盆（例如：覺得太污糟、唔鍾意隻砂嘅腳感、或者轉身位都無），佢哋就會出現「站立式排便」或者索性屙喺砂盆出面㗎～
原因 2：對個廁所好不滿
好似上面提到咁，主子對廁所係好嚴謹嘅。只要佢唔滿意，就可能會周圍屙。
如果主子有呢啲舉動，奴才就要快啲搵出原因。如果改咗個廁所佢都係咁，好大機會係因為主子壓力太大、情緒好緊張呀！
四、主子屙完屎唔肯埋砂？
原因 1：嫌棄隻貓砂
主子可能覺得隻貓砂質地太差、刮腳、或者挖落去個感覺唔爽。因為唔想再掂到啲砂，所以屙完就即刻逃亡喇～
原因 2：佢喺屋企覺得好安心
頭先講過，埋屎係怕天敵聞到。
如果主子住咗喺屋企好耐，覺得好有安全感、完全唔驚有敵人，佢就會變到好「大剌剌」，覺得無必要埋砂。其實呢個亦都係佢對奴才同屋企環境百分百信任嘅表現嚟㗎！
原因 3：細個嗰陣無學好
有啲貓貓一出世無耐就離開咗媽媽，或者無同其他貓一齊生活嘅經驗。因為無人教過，佢哋根本無「埋砂」呢個概念同技能，所以屙完就直接走。
原因 4：純粹係個人（貓）僻好
本喵就是不！想！埋！
你主子係咪有時埋，有時又唔埋？搞唔好根本無原因，佢今日心情唔靚就係唔想埋囉。畢竟貓心海底針，有啲嘢我哋呢啲凡夫俗子係理解唔到㗎喇～
主子可以幾耐唔去廁所？
一般嚟講，健康嘅貓貓可以忍尿 24～48 小時。平均嚟講，大約 36 小時係上限。
但如果主子超過 48 小時都無去廁所，咁就大件事喇！
呢個可能係尿道阻塞或者泌尿系統疾病嘅警訊，請即刻帶佢去睇醫生，唔好等佢受苦呀！
去完廁所捽屁股？
你有無見過主子屙完屎，坐喺地下好似「賽車」咁捽屁股？當佢哋屁股上面有污糟嘢、或者覺得屎忽痕、肛門腺唔舒服嗰陣，就會咁樣做。
奴才可以用濕紙巾幫主子睇吓係咪有嘢黐住。如果外觀無嘢但主子仲係咁捽，就要搵獸醫檢查吓肛門腺有無發炎喇～
參考資料
- 6 Reasons Your Cat is Peeing Outside the Litter Box – PetMD
- How to Stop Your Cat From Peeing Outside the Litter Box – The Spruce Pets
- Why is My Cat Peeing Everywhere All of a Sudden? – Arm & Hammer